لاہور: ٹینس سٹار اعصام الحق نے ثانیہ مرزا کو اگلے سال مکسڈ ڈبلز میں پارٹنر بننے کی آفر کردی ہے۔

لاہور جم خانہ میں جاری حسن طارق رحیم نیشنل رینکنگ  ٹینس چیمپئن شپ کے موقع پر اعصام الحق کا کہنا تھا کہ ثانیہ مرزا کی خواہش پر ان کے ساتھ لاہور میں اسپورٹس بورڈ پنجاب کے کورٹ پر اکٹھے ٹریننگ  کی۔

اعصام الحق کا کہنا تھا کہ وہ بہت اچھی کھلاڑی ہیں اور ان کےساتھ بیرون ملک بھی ملاقات رہتی ہے، اس سال انہوں نے زیادہ ٹینس نہیں کھیلی تاہم اگلے سال وہ زیادہ انٹرنیشنل ایونٹس مین شرکت کی خواہش مند ہیں۔

اعصام الحق کا کہنا تھا کہ ثانیہ کو بولا ہے کہ ہم دونوں مسکڈ ڈبلز مقابلوں میں ایک جوڑی بن کر حصہ لے سکتے ہیں، وہ اگر مکسڈ ڈبلز کیٹیگری میں کھیلنے پر تیار ہوجاتی ہیں تو انہیں ویلکم کہوں گا۔

اعصام الحق کا مزید کہنا تھا کہ پاکستانی نوجوان کھلاڑیوں میں ٹیلنٹ ہے لیکن انہیں اعصام اور عقیل خان بننے کے لیے بہت محنت اور انٹرنیشنل میچز کی ضرورت ہے۔

واضح رہے کہ گزشتہ دنوں ثانیہ مرزا پاکستان میں موجود تھی جبکہ وہ ایک ہفتے قیام کے بعد اپنے شوہر شعیب ملک کے ہمراہ گزشتہ روز دبئی روانہ ہوگئی ہیں۔

پاکستان میں قیام کے دوران انہوں نے پاکستان کے انٹرنیشنل ٹینس سٹار اعصام الحق اور عقیل خان کیساتھ دو گھنٹہ تک لاہور کے ٹینس کورٹ میں پریکٹس کی۔

اس موقع پر ثانیہ مرزا کا کہنا تھا کہ ٹینس کورٹ میں عالمی معیار کی سہولیات دیکھ کر خوشی ہوئی، اسپورٹس بورڈ نے شاندار ٹینس کورٹ بنایا ہے جس کی وجہ سے ٹینس کورٹ میں پریکٹس کرکے لطف آیا ہے۔