سیالکوٹ واقعے پر سری لنکن کرکٹر انجیلو میتھیوز نے افسوس کا اظہار کیا ہے۔

سماجی رابطے کی مائیکرو بلاگنگ ویب سائٹ ٹوئٹر پر ٹوئٹ کرتے ہوئے انجیلو میتھیوز کا کہنا تھا کہ ایک سری لنکن کے قتل کا سن کر صدمہ اور افسوس ہوا ہے۔

Shocking and sickening to hear the barbaric murder of a Srilankan.. Those who are responsible should be brought before Justice and punished! No mankind should decide the fate of another #sialkot

— Angelo Mathews (@Angelo69Mathews) December 4, 2021

انہون نے مزید کہا کہ کسی انسان کو کسی دوسرے کی قسمت کے فیصلے کا اختیار نہیں ہے، اس وحشیانہ واقعے کے ملزمان کو گرفتار کرکے انصاف کے کٹہرے میں لایا جائے۔

واضح رہے کہ گزشتہ دنوں سیالکوٹ میں افسوس ناک واقعہ پیش آیا ہے، جہاں ایک نجی فیکٹری کا سری لنکن مینجر فیکٹری ملازمین کے تشدد سے ہلاک ہوگیا تھا جبکہ مشتعل افراد نے اسے سڑک پر گھسیٹا اور پھر آگ لگادی تھی۔

مشتعل افراد کی جانب سے یہ دعوی کیا گیا تھا کہ سری لنکن مینجر نے مبینہ طور پر مذہبی جذبات مجروح کیے تھے جبکہ مشتعل افراد نے فیکٹری میں توڑ پھوڑ بھی کی۔

دوسری جانب پریانتھا کمارا کا جسد خاکی لاہور ایئرپورٹ سے سری لنکن ایئرلائن کی پرواز کے ذریعے کولمبو بھجوائی گئی ہے۔ اس موقع پر سری لنکن سفارتخانے کے افسران بھی موجود تھے۔ پریانتھا کمارا کا جسد خاکی گزشتہ روز سیالکوٹ سے لاہور منتقل کیا گیا تھا۔

 پولیس نے فیکٹری میں کام کرنے والے 900 افراد کے خلاف مقدمہ درج کرلیا ہے جبکہ مقدمے میں دہشت گردی  اور قتل سمیت دیگر سنگین دفعات شامل کی گئی ہیں۔

واقعے کی سنگینی کے پیش نظر ملزمان کی گرفتاری کے لیے آر پی او گوجرانولہ کی سربراہی میں مختلف علاقوں میں چھاپوں کا سلسلہ جاری ہے۔ ملزمان کی گرفتاری کے لیے 50 سے زائد مقامات پر چھاپے مارے گئے ہیں اور اب تک 100 سے زائد افراد کو گرفتار کیا جاچکا ہے۔