لاہور: شاہین آفریدی نے تسلیم کیا ہے کہ وہ بہت جارحانہ انداز میں کرکٹ کھیلتے ہیں جس کی وجہ سے ان میں غصہ بھی موجود ہے۔

لاہور قلندرز کا پی ایس ایل 7 کے لیے پری کیمپ اختتام پزیر ہوگیا جس کے بعد میڈیا سے گفتگو کرتے ہوئے لاہور قلندرز کے کپتان شاہین شاہ آفریدی کا کہنا تھا کہ پری کیمپ شاندار رہا اور دستیاب کھلاڑیوں نے خوب محنت کی۔

کپتان شاہین آفریدی کا کہنا تھا کہ جن چیزوں پر کام کرنے کی ضرورت تھی ان  پر کام کیا اور بہتری آئی جبکہ پری کیمپ میں محمد حفیظ کی وجہ سے بہت فائدہ ہوا ہے۔

ان کا کہنا تھا کہ کپتانی کی وجہ سے پوری ٹیم کو ساتھ لے کر چلنا ہے، کپتانی کی وجہ سے ذمہ داری بڑھ گئی ہے لیکن محمد حفیظ سے مدد مل رہی ہے۔

انہوں نے کہا کہ فاسٹ بولر کا انداز جارحانہ ہوتا ہے جس کی وجہ سے انہیں غصہ بھی آتا ہے لیکن کپتانی کی وجہ سے غصے کو کنٹرول کرنا پڑے گا اور پر سکون رہوں گا۔

شاہین آفریدی نے کہا کہ پرسکون رہتے ہوئے سب سے کام لینا پڑتا ہے جبکہ مجھے اپنی پرفارمنس پر بھی توجہ دینا پڑی گی کیونکہ اگر میری پرفارمنس بہتر ہوگی تب ہی تو دوسروں سے پرفارمنس پر بات کرسکوں گا۔

دوسری جانب حال ہی میں انٹرنیشنل کرکٹ سے ریٹائرمنٹ لینے والے پاکستانی کرکٹر اور پی ایس ایل میں لاہور قلندرز کی نمائندگی کرنے والے بیٹر محمد حفیظ نے لاہور قلندرز کی ٹیم میں خامی سے پردہ اٹھادیا ہے۔

محمد حفیظ کہتے ہیں فیلڈنگ بہتر نہ ہونے کے سبب ٹیم اب تک پیچھے ہے جبکہ ہمارے پاس بہترین فاسٹ بولر اور بیٹسمین موجود ہیں لیکن اگر فیلڈنگ بہتر ہو تو جیتنے کے امکانات بڑھ جاتے ہیں۔