عالمی نمبر ون سربین ٹینس اسٹار نوواک جوکووچ اب دبئی میں ہونے والے ٹورنامنٹ میں حصہ لیں گے۔

میڈٰیا رپورٹس کے مطابق کورونا کی ویکسین نہ لگوانے والے سربین ٹینس اسٹار نوواک جوکووچ اب اے ٹی پی دبئی ٹینس ٹورنامنٹ میں حصہ لیں گے جو کہ 21 فروری تا 26 فروری تک دبئی میں کھیلی جائے گی۔

رپورٹس کے مطابق سوشل میڈیا پر اسپورٹس جرنلسٹ کی جانب سے دبئی میں ہونے والے ٹینس ٹورنامنٹ میں شرکت کرنے والے کھلاڑیوں کی فہرست جاری کی گئی ہے جس میں جوکووچ کا بھی نام درج ہے۔

رپورٹس کے مطابق اس فہرست کی بنیاد پر یہ اندازہ لگایا جارہا ہے کہ نوواک جوکووچ اگلے ماہ دبئی میں ہونے والے ٹینس ٹورنامنٹ کا حصہ ہوں گے۔

دوسری جانب جوکووچ کی نئے قوانین کے بعد فرنچ اوپن میں شرکت مشکوک ہوگئی ہے کیونکہ فرانسیسی وزارت کھیل کا کہنا ہے کہ فرانس میں کھیلنے کے لیے کھلاڑیوں کو ویکسین لگوانا لازمی ہوگا۔

فرانسیسی وزارت کھیل کا اپنے بیان میں کہنا تھا کہ فرانسیسی پارلیمنٹ کی جانب سے منظور کردہ نئے ویکسین پاس کا اطلاق تاحکم ثانی کھلاڑیوں اور رضاکاروں سے لے کر بیرون ملک سے آنے والے تمام افراد پر ہو گا۔

واضح رہے کہ نوواک جوکووچ کو گذشتہ دنوں کورونا ویکسین نہ لگوانے کی بنیاد پر آسٹریلین اوپن میں شرکت سے روک دیا تھا جبکہ انہیں آسٹریلیا سے بھی ملک بدر کردیا گیا تھا۔

انہوں نے خود کو طبی بنیادوں پر ویکسین سے استشنی قرار دیا تھا جبکہ اجازت نہ ملنے پر انہوں نے عدالت سے بھی رجوع کیا لیکن انہیں کامیابی نہ مل سکی اور دونوں مرتبہ عدالت نے ان کی درخواستوں کو خارج کرتے ہوئے انہیں ملک بدر کرنے کا حکم دیا تھا۔

یہ بھی پڑھیں: کورونا ویکسین نہ لگوانے والے ٹینس اسٹار نواک جوکووچ ویکسین کمپنی کے مالک نکلے

بعد ازاں جوکووچ آسٹریلیا سے ملک بدر ہونے کے بعد واپس اپنے ملک پنچ گئے تھے جبکہ اس موقع پر ان کی فینز کی جانب ان کا بھرپور استقبال کیا گیا تھا۔