کراچی: نیشنل اسٹیڈیم میں کھیلے جانے والے پی ایس ایل 7 کے میچز کے حوالے سے سیکیورٹی کوآرڈینیشن کا اجلاس منعقد ہوا ہے۔

نیشنل اسٹیڈیم کراچی میں کھیلے جانے والے پی ایس ایل 7 کے میچز کے حوالے سے ایس ایس یو ہیڈ کوارٹرز کے کانفرنس ہال میں سیکیورٹی کوآرڈینیشن کاایک اہم اجلاس منعقد ہوا۔

اس اجلاس میں ایونٹ کے آغاز سے قبل سیکیورٹی انتظامات کا جائزہ لیا گیا جبکہ اجلاس کی صدارت ڈی آئی جی سیکیورٹی اینڈ ایمرجنسی سروسز ڈویژن مقصود احمد نے کی۔

علاوہ ازیں کمانڈنٹ ایس ایس یو ذیشان شفیق صدیقی، ڈپٹی کمشنر ایسٹ آصف جان، پاک آرمی سے کرنل شکر زئی، ایس ایس پی ایسٹ قمر رضا جسکانی، رینجرز اور پی سی بی کے حکام سمیت تمام اسٹیک ہولڈرز نے اجلاس میں شرکت کی۔

کمانڈنٹ ایس ایس یو ذیشان شفیق صدیقی نے شرکاء کو سیکیورٹی انتظامات کے بارے میں بریفنگ دی کہ سیکیورٹی ڈویژن کے اہلکار جن میں ایس ایس یو کمانڈوز، ڈسٹرکٹ پولیس، ٹریفک پولیس،اسپیشل برانچ، سندھ رینجرز، فوج اور دیگر قانون نافذ کرنے والے اداروں کے اہلکار نیشنل اسٹیڈیم کراچی، کراچی ایئرپورٹ، راستوں، ہوٹلوں، پریکٹس گراؤنڈزاور دیگر مختلف علاقوں میں سیکیورٹی کے فرائض سرانجام دیں گے جبکہ حساس مقامات پر ماہر نشانہ بازبھی تعینات کیے جائیں گے۔

 ڈی آئی جی سیکیورٹی نے ٹیموں اور تماشائیوں کو فول پروف سیکیورٹی فراہم کرنے کا عزم کیا اورہدایات کیں کہ ایونٹ کے پرامن انعقاد کو یقینی بنانے کے لیے تمام تروسائل کو بروئے کار لایا جائے۔

سر شاہ سلیمان روڈ کے ایک ٹریک کے علاوہ تمام سڑکیں عوام کی سہولت کے لیے کھلی رہیں گی جبکہ تماشائیوں کو پارکنگ پوائنٹس سے اسٹیڈیم تک شٹل بس سروس کے ذریعے پہنچایا جائے گا۔

تماشائیوں کی سہولت کے لیے ٹریک سوٹ میں ملبوس ایس ایس یو کمانڈوز پارکنگ پوائنٹس سے لے کر انکلوژرز تک ان کی مکمل رہنمائی اور مدد کریں گے۔

نیشنل اسٹیڈیم آنے والے شائقین کے لیے درج ذیل پارکنگ پوائنٹس مختص کیے گئے ہیں جس میں پہلا حکیم سعید گراؤنڈ نزد بیت المکرم مسجد یونیورسٹی روڈ اور دوسرا نیشنل کوچنگ سینٹر سے ملحقہ چائنا گراؤنڈ (صرف وی آئی پیز کے لیے)۔

اسٹیڈیم کے اندر سی این جی سلینڈر نصب گاڑیوں کے داخلے پر سخت پابندی ہوگی جبکہ تماشائیوں کے لیے بھی خصوصی ہدایات جاری کی گئی ہیں۔

شائقین کرکٹ پاکستان بھر میں کسی بھی نامزد ایم اینڈ پی اسٹورز پر یا کرکٹ ڈاٹ بک می ڈاٹ پی کے سے میچ کے ٹکٹ خرید سکتے ہیں جبکہ تماشائیوں کو اپنی شناخت ثابت کرنے کے لیے قومی شناختی کارڈ اپنے ہمراہ لازمی رکھنا ہوگا۔

لمبی قطاروں میں انتظار سے بچنے کے لیے اسٹیڈیم میں وقت سے پہلے پہنچیں جبکہ 12 سال سے زائد عمر کے افراد کے لیے کووڈ 19 ویکسی نیشن لازمی ہے۔

اسٹیڈیم میں داخلے سے پہلے شائقین کو ویکسی نیشن سرٹیفکیٹ پیش کرنا ہوگا اور اسٹیڈیم میں داخلے کے وقت ماسک پہننا لازمی قرار دیا گیا ہے۔

این سی او سی کے منظور کردہ ضوابط کی خلاف ورزی کی صورت میں اسٹیڈیم سے باہر نکال دیا جائے گا، کوئی بھی آتشی اسلحہ، کھلونا بندوقیں، دھماکہ خیز مواد، پٹاخے، سگریٹ، ماچس، لائٹر، کوئی بھی تیز دھار مواد جیسے چاقو اور دھات یا لکڑی اسٹیڈیم کے اندر لے جانے کی اجازت نہیں ہوگی۔

کسی بھی بینر، پوسٹر یا پلے کارڈ جس پر مذہب یا نسل کی بنیاد پر امتیازی سلوک یا فحش باتیں درج ہوں گی سختی سے ممانعت ہے۔ تماشائیوں کوگراؤنڈ، فنکاروں اور ساتھی تماشائیوں پرکسی قسم کی چیز پھینکنے کی اجازت نہیں ہوگی۔