ویسٹ انڈیز میں جاری انڈر 19 ورلڈ کپ میں بھارتی ٹیم کے کیمپ میں کپتان سمیت پانچ کھلاڑیوں میں کورونا ٹیسٹ مثبت آ گیا ہے۔

کورونا کا شکار ہونے والے تمام کھلاڑیوں کو یوگنڈا کے خلاف میچ سے باہر کر دیا گیا ہے، یوگنڈا کے خلاف میچ آج کھیلا جائے گا۔

کل جمعہ کو ہونے والے پی سی آر ٹیسٹ کے مطابق بھارتی ٹیم کے کپتان یش دھول سمیت پانچ کھلاڑیوں میں کورونا ٹیسٹ مثبت آیا ہے جس کے بعد کھلاڑیوں کو آئسولیٹ کر دیا گیا ہے۔

کورونا سے متاثرہ کھلاڑیوں کو آج ہونے والے گروپ میچ سے بھی الگ کر دیا گیا ہے، بھارتی ٹیم پہلے ہی ورلڈ کپ کے کوارٹر فائنل میں پہنچ گئی ہے۔

ویسٹ انڈیز سے ملنے والی رپورٹس کے مطابق اگر بھارت آج یوگنڈا کو ہرا کر اپنے گروپ میں ٹاپ پر آتا ہے تو اس کا کوارٹر فائنل 29 جنوری کو ہو گا ۔

کوارٹر فائنل سے قبل بھارت کے تمام آئسولیٹ کھلاڑی واپس کیمپ جوائن کر لیں گے ، مگر کپتان یش دھول کو مزید ایک دن اور قرنطینہ میں گزارنا ہو گا۔

آئی سی سی کے ترجمان کے مطابق آئرلینڈ کے خلاف میچ میں اترنے والے کھلاڑیوں کے کورونا ٹیسٹ منفی آئے ہیں۔

ٹورنامنٹ پروٹوکول کے مطابق کورونا مثبت آنے والے کھلاڑیوں کو لازمی پانچ دن کا قرنطینہ کرنا ہو گا ، اس دوران ان کا تین مرتبہ کورونا ٹیسٹ کیا جائے گا ۔