کراچی: پی سی بی نے پی ایس ایل 7 کے  میچز کے لیے 25 فیصد تماشائیوں کو داخلے کی اجازت دی ہے۔

این سی او سی  نے پاکستان سپر لیگ 7 کے پہلے مرحلے میں 25 فیصد تماشائیوں کو شرکت کی منظوری دی ہے جس کے بعد پی سی بی نے بھی 25 فیصد تماشائیوں کو ہی داخلے کی اجازت دینے کا فیصلہ کیا ہے۔

فیصلے کے مطابق کراچی میں شیڈول ہر میچ میں تقریباَ 8000 تماشائیوں کونیشنل اسٹیڈیم کراچی میں داخلے کی اجازت ہوگی جبکہ تماشائیوں کو اسٹیڈیم میں داخلے کے لیے بارہ سال سے زائد عمر کے تمام افراد کی مکمل کووڈ 19 ویکسین ہونا لازمی ہوگا۔

اسٹیڈیم کے داخلی دروازوں پر اپنا درست ویکسی نیشن سرٹیفکٹ دکھانا لازمی ہوگا اور اسٹیڈیم میں چہرے کو ماسک سےمسلسل ڈھانپے رکھنا لازم ہوگا۔

این سی او سی کی جانب سے جاری کردہ کووڈ 19 سے متعلق ہدایات  کی خلاف ورزی کرنے والے شخص کو اسٹیڈیم سے باہر نکال دیا جائے گا۔

پی سی بی کے چیف آپریٹنگ آفیسر سلمان نصیر کا کہنا ہے کہ این سی او سی کی ہدایات پر سختی سے عمل درآمد کرنے میں کوئی کسر نہیں چھوڑیں گے، تماشائیوں کی جانب سے بھی ہمیں غیر مشروط تعاون کی ضرورت ہوگی۔

واضح رہے کہ پی ایس ایل 7 کا پہلا مرحلہ 27 جنوری سے 7 فروری تک نیشنل اسٹیڈیم کراچی میں کھیلا جائے گا جبکہ ایونٹ کی آن لائن ٹکٹ کرکٹ ڈاٹ بک می ڈاٹ پی کے اورایم اینڈ پی اسٹورز سے خریدی جاسکتی ہیں۔