سربین ٹینس اسٹار نوواک جوکووچ کے ویزے کے فیصلے کے  انتظار کے باعث آسٹریلین اوپن ڈرا تاخیر کا شکار لگ رہی ہے۔

غیر ملکی خبر رساں ادارے کے مطابق نوواک جوکووچ کا دوسری بار ویزا منسوخ ہونے اور غیر یقینی صورت حال کے پیش نظر آسٹریلین اوپن ٹینس ڈرا کو اگلے نوٹس تک ملتوی کر دیا گیا ہے۔

رپورٹس کے مطابق آسٹریلیا کے امیگریشن کے وزیر الیکس ہاک جوکووچ کے ویزا کو منسوخ کرنے کے لیے اپنے صوابدیدی اختیارات استعمال کرسکتے ہیں جو آسٹریلین اوپن میں جوکووچ کو ممکنہ 21 واں ریکارڈ سے روک سکتا ہے۔

دوسری جانب عدالت کو گمراہ کن معلومات دینے کی وجہ سے جوکووچ پر پانچ سال تک قید کا خطرہ منڈلانے لگا ہے کیونکہ انہوں نے سرکٹ کورٹ کے حلف نامے میں کورونا کی تشخیص کی تاریخ 16 دسمبر درج کی ہے۔

جبکہ گذشتہ دنوں ان کا ویزا منسوخ نہ کیے جانے کے فیصلے کے بعد جوکووچ نے اپنے سوشل میڈیا پر جاری بیان میں کہا تھا کہ انہیں 16 دسمبر نہیں بلکہ 17 دسمبر کو کورونا کی تشخیص کا علم ہوا تھا جس کی وجہ سے انہوں نے 16 دسمبر کو عوامی پروگرام میں شرکت کی تھی۔

واضح رہے کہ جوکووچ جب گزشتہ دنوں آسٹریلین اوپن میں شرکت کے لیے آسٹریلیا پہنچے تو امیگریشن حکام نے انہیں روکتے ہوئے ان کا ویزہ منسوخ کردیا تھا جس کے بعد انہوں نے عدالت سے رجوع کرنے کا فیصلہ کیا تھا۔

جوکووچ نے عدالت میں دائر کی گئی درخواست میں کہا تھا کہ ان کے پاس درست ویزہ اور آسٹریلین اوپن کے منتظمین کی جانب سے طبی چھوٹ تھی جبکہ انہوں نے موقف اختیار کیا تھا کہ کہ وہ سفر کے پورے معیار پر اترتے ہیں۔