ماؤنٹ منگوئی: بنگلادیش نے نیوزی لینڈ کو نیوزی لینڈ کی سرزمین پر پہلے ٹیسٹ میچ میں شکست دے کر تاریخی فتح حاصل کرلی ہے۔

نیوزی لینڈ کے ماؤنٹ منگوئی ٹیسٹ میں بنگلادیش کی ٹیم نے میزبان ٹیم کے خلاف 8 وکٹوں سے کامیابی حاصل کی ہے جبکہ یہ کامیابی بنگلادیش نے پہلی مرتبہ نیوزی لینڈ کی سرزمین پر حاصل کی ہے۔

اسی کے ساتھ ہی بنگلادیش کی ٹیم نے چھٹی مرتبہ اپنے ہوم گراؤنڈ کے باہر یہ کامیابی حاصل کی ہے جبکہ 10 سال بعد پہلی مرتبہ کسی ٹیم نے نیوزی لینڈ کی سرزمین پر کوئی ٹیسٹ میچ جیتا ہے۔

اس سے قبل پاکستان ٹیم نے 2011 میں نیوزی لینڈ کے خلاف ہلٹن ٹیسٹ میں کامیابی حاصل کی تھی جس کے بعد ایشین ٹیم نے نیوزی لینڈ میں 19 ٹیسٹ میچز کھیلے جس میں سے 16 میچز میں شکست ہوئی جبکہ 3 میچز ڈرا ہوگئے۔

بنگلادیش کی کامیابی

بنگلادیش نے ٹیسٹ سیریز کا پہلا ٹیسٹ 8 وکٹوں سے اپنے نام کیا جبکہ بنگلادیش کو جیت کے لیے نیوزی لینڈ نے 40 رنز کا ہدف دیا تھا جبکہ اس ٹیسٹ میچ کے بہترین کھلاڑی کا اعزاز عبادت حسین کے نام رہا، جنہوں نے دوسری اننگ میں 6 وکٹیں حاصل کرکے نیوزی لینڈ کی ٹیم کو ڈھیر کردیا تھا۔

🇧🇩 Ebadot Hossain was unstoppable in the second innings against New Zealand.

His splendid performance earned him Player of the Match honours 🙌#NZvBAN | #WTC23 pic.twitter.com/thzGkX81pt

— ICC (@ICC) January 5, 2022

اس میچ میں بنگلادیش نے ٹاس جیت کر پہلے بولنگ کرنے کا فیصلہ کیا جو ان کے لیے فائدہ مند ثابت ہوا جبکہ نیوزی لینڈ نے پہلی اننگ میں 328 رنز بنائے جس کے جواب میں بنگلادیش نے رنز کا ڈھیر کھڑا کردیا تھا جس کے بوجھ تلے نیوزی لینڈ کی ٹیم ایسے دبی کے اٹھ نہ سکی۔

بنگلادیش کی پوری ٹیم نے اپنی پہلی اننگ میں شاندار بیٹنگ کا مظاہرہ کیا اور 458 رنز کا پہاڑ کھڑا کیا جبکہ مومن الحق نے 88، لٹن داس نے 86، محمود الحسن 78 اور نجم الحسن شنٹو نے 64 رنز اسکور کیے۔

نیوزی لینڈ کی ٹیم دوسری اننگ میں عبادت حسین کی شاندار بولنگ کی بدولت صرف 169 رنز ہی اسکور کرسکی تھی اور بنگلادیش کو جیت کے لیے 40 رنز کا ہدف دیا تھا۔