ایشین چیمپئن باکسر عثمان وزیر نے پاکستان سویٹ ہوم میں ایک ماہ میں باکسنگ اکیڈمی بنانے کا اعلان کیا ہے۔

پاکستان کے ابھرتے ہوئے باکسنگ اسٹار اور ایشین چیمپئن عثمان وزیر نے پاکستان سویٹ ہوم کے دورے کے موقع پر تقریب سے خطاب کرتے ہوئے کہا کہ پاکستان سویٹ ہوم میں بنائی جانے والی باکسنگ اکیڈمی میں ملکی و غیرملکی کوچز کی نگرانی میں بچوں کو ٹریننگ دی جائے گی۔

ان کا کہنا تھا کہ آئندہ چھ ماہ میں یہاں سے بچے تیار ہو کر پاکستان کے لیے باکسنگ ایونٹ میں نمائندگی کریں گے۔ مجھے پاکستان سویٹ ہوم آکر محسوس ہوا کہ اس ملک کے اصل ہیرو پاکستان سویٹ ہوم کے سربراہ زمرد خان ہیں یہ جس طرح بچوں اور بچیوں کی تربیت کررہے ہیں یہ ایک بہترین کام ہے۔

انہوں نے اپنی تمام مقابلوں کی آمدنی میں سے ایک حصہ پاکستان سویٹ ہوم کو عطیہ کرنے کا اعلان کرتے ہوئے کہا کہ مجھے امید ہے کہ پاکستان سویٹ ہوم سے ایک اچھا ٹیلنٹ نکلے گا جو آئندہ پاکستان کی نمائندگی کرے گا۔

عثمان وزیر کا کہنا تھا کہ گلگت بلتستان میں پاکستان سویٹ ہوم کے لیے میری خدمات حاضر ہیں۔ میں ایک حادثاتی طور پر باکسر بنا جبکہ میں ایک فٹبالر تھا لیکن میں باکسر بن گیا۔

تقریب سے خطاب کرتے ہوئے پاکستان سویٹ ہوم کے سربراہ زمرد خان کا کہنا تھا کہ آج باکسنگ رنگ کے چیمپئن کا پاکستان سویٹ ہوم آنا ہمارے لیے فخر کی بات ہے۔

زمرد خان کا مزید کہنا تھا کہ سویٹ ہوم کے بچے عثمان وزیر کی آنے والے ایونٹ میں کامیابی کے لیے دعا گو ہیں جبکہ باکسنگ اکیڈمی بنانے پر عثمان وزیر کا شکرگزار ہوں۔

تقریب سے خطاب کرتے ہوئے یوکے چیمبر کے صدر خورشید برلاس نے کہا کہ پاکستان سویٹ ہوم کے بچوں اور بچیوں کے لیے ایونٹ منعقد کریں گے جبکہ یوکے چیمبر کے پلیٹ فارم سے پاکستان سویٹ ہوم کے لیے فنڈز بھی اکٹھے کیے جائیں گے۔