پاکستان کرکٹ ٹیم کے آل راؤنڈر محمد حفیظ کی ریٹائرمنٹ پر ان کی اہلیہ جذباتی ہوگئی تھی۔

سماجی رابطے کی مائیکرو بلاگنگ ویب سائٹ ٹوئٹر پر ٹوئٹ کرتے ہوئے محمد حفیظ کی اہلیہ نازیہ حفیظ کا اپنے شوہر کو مخاطب کرتے ہوئے کہنا تھا کہ ’جب آپ اپنی ریٹائرمنٹ کا اعلان کرنے کے لیے جانے سے قبل تیار ہورہے تھے تو اس وقت میں بہت جذباتی تھی‘۔

I was so emotional in the morning when u was getting ready to go for press conference to announce ur retirement. Proud of u my Man @MHafeez22 as ur no1 fan wil miss u in pakistan green top. Love u 💋 pic.twitter.com/ay8znkKOBO

— Nazia Hafeez (@naziahafeez8) January 3, 2022

ان کا کہنا تھا کہ ’مجھے آپ پر فخر ہے اور آپ کی نمبر ون پرستار پاکستان گرین ٹاپ میں آپ کو کمی کو محسوس کرے گی‘ جبکہ ساتھ ہی انہوں نے محمد حفیظ سے اپنی محبت کا اظہار بھی کیا۔

یہ بھی پڑھیں: محمد حفیظ کے انٹرنیشنل کیریئر پر ایک نظر

نازیہ حفیظ نے ٹوئٹ کرتے ہوئے محمظ حفیظ کی تصویر بھی شیئر کی ہے جو پریس کانفرنس کے لیے جانے سے قبل لی گئی تھی جبکہ اس تصویر میں محمد حفیظ کو مسکراتے ہوئے بھی دیکھا جاسکتا ہے۔

واضح رہے کہ قومی ٹیم کے آل راؤنڈر محمد حفیظ نے گزشتہ روز پریس کانفرنس کرتے ہوئے انٹرنیشنل کرکٹ سے ریٹائرمنٹ کا اعلان کیا تھا جبکہ اس موقع ان کا کہنا تھا کہ انہوں نے ہمیشہ فخر کے ساتھ پاکستان کی نمائندگی کی ہے۔

پریس کانفرنس کرتے ہوئے انہوں نے کہا تھا کہ 18 سال قبل جو سفر شروع کیا تھا آج اس سے ریٹائر ہورہا ہوں لیکن جب تک فٹ ہوں اور پرفارم کررہا ہوں لیگ کھیلتا رہوں گا۔

خیال رہے کہ محمد حفیظ نے اس سے قبل 2018 میں ٹیسٹ کرکٹ سے ریٹائرمنٹ کا اعلان کیا تھا تاہم اب انہوں نے انٹرنیشنل کرکٹ سے مکمل ریٹائرمنٹ کا فیصلہ کیا ہے۔

یاد رہے کہ محمد حفیظ پاکستان کے لیے 392 میچز کھیل چکے ہیں جس میں انہوں نے 21 سنچریوں اور 64 نصف سنچریوں کی مدد سے 12 ہزار 789 رنز اسکور کیے ہیں جبکہ بین الاقوامی کرکٹ میں ان کی 253 وکٹیں بھی حاصل کی ہیں۔