کراچی : نیشنل اسٹیڈیم کے اندر آگ لگ گئی ہے جسے بجھانے کے لیے فائر بریگیڈ کی دو گاڑیاں روانہ ہوگئی ہیں۔

تفصیلات کے مطابق کراچی کے نیشنل اسٹیڈیم میں آتشزدگی کی اطلاعات موصول ہوئی ہیں جبکہ آگ کو بجھانے کے لیے فائر بریگیڈ کی دو گاڑیاں روانہ ہوگئی ہیں۔ اطلاعات کے مطابق آگ نیشنل اسٹیڈیم کے اندر موجود ساؤنڈ سسٹم میں لگی ہے۔

واضح رہے کہ کل سے کراچی کے نیشنل اسٹیڈٰم میں پی ایس ایل کے ساتویں ایڈیشن کا آغاز ہورہا ہے جس کا ابتدائی میچ کراچی کنگز اور دفاعی چیمپئن ملتان سلطانز کی ٹیموں کے درمیان کھیلا جائے گا۔

نیشنل اسٹیڈٰیم کراچی میں پہلے مرحلے کے میچز 7 فروری تک جاری رہیں گے جبکہ بقیہ میچز 10 فروری سے لاہور کے قذافی اسٹیڈیم میں کھیلے جائیں گے جبکہ ایونٹ کا فائنل 27 فروری کو ہوگا۔

دوسری جانب ایونٹ سے قبل ہی کورونا کے وار جاری ہیں اور گذشتہ روز پشاور زلمی کے کپتان وہاب ریاض اور حیدر علی کا کووڈ رزلٹ مثبت آیا تھا جبکہ اس سے قبل پشاور زلمی کے ہی کھلاڑی کامران اکمل اور ارشد اقبال کورونا میں مبتلا ہوئے تھے۔

میچز کے دوران ٹریفک کے نظام کو بہتر رکھنے کے لیے شائقین کرکٹ کی گاڑیوں کے لیے پوائنٹس بھی مختص کیے گئے ہیں جہاں سے شٹل سروس کے ذریعے تماشائیوں کو اسٹیڈیم تک پہنچایا جائے گا۔

ڈی آئی جی سکیورٹی اینڈ ایمرجنسی سروسز ڈویژن کے ترجمان کے مطابق گاڑیاں پارک کرنے کے لیے گلشن اقبال میں یونیورسٹی روڈ پر بیت المکرم مسجد کے قریب حکیم سعید گراؤنڈ کو پارکنگ کے لیے مختص کیا گیا ہے جبکہ نیشنل کوچنگ سینٹر سے ملحقہ چائنا گراؤنڈ صرف وی آئی پی ویز کی گاڑیوں کی پارکنگ کے لیے مختص ہوگا۔