اسلام آباد: آسٹریلیا کی کرکٹ ٹیم 24 برس بعد پاکستان پہنچ گئی ہے۔

آسٹریلین کرکٹ ٹیم دورہ پاکستان کے لیے اسلام آباد پہنچ گئی جبکہ آسٹریلیا کی کرکٹ ٹیم 24 سال بعد سیریز کھیلنے کے لیے پاکستان پہنچی ہے۔

آسٹریلیا کی کرکٹ ٹیم اس دورے میں 3 ٹیسٹ، 3 ون ڈے اور ایک ٹی 20 میچ کھیلے گی، پاکستان اور آسٹریلیا کے درمیان سیریز کا پہلا ٹیسٹ میچ 4 مارچ سے راولپنڈی  اسٹیڈیم میں شروع ہوگا۔

اس سے قبل 28 فروری کو صبح ساڑھے 11 بجے سے دوپہرڈھائی بجے تک قومی ٹیم اور آسٹریلیا کرکٹ ٹیم کا ٹریننگ سیشن ہوگا۔

پی سی بی حکام کا کہنا ہے کہ یکم مارچ صبح ساڑھے 11 بجے قومی ٹیم کے کپتان بابراعظم اور آسٹریلوی کپتان ٹیسٹ سیریز کی ٹرافی کی رونمائی کریں گے۔

پی سی بی کے مطابق 2 مارچ کو بھی دوپہر ڈھائی بجے تک پاکستان اور آسٹریلیا کا پنڈی کرکٹ اسٹیڈیم میں ٹریننگ سیشن ہوگا۔

پی سی بی حکام کے مطابق آسٹریلیا کی کرکٹ ٹیم 2 روز بائیوسیکیورببل میں رہے گی اور دو دن بعد آسٹریلین ٹیم کے کورونا ٹیسٹ کیے جائیں گے۔

علاوہ ازیں ٹیسٹ سیریز میں شامل دوسرا میچ 12 سے 16 مارچ کے دوران کراچی میں کھیلا جائے گا جبکہ تیسرا اورآخری ٹیسٹ 21 سے 25 مارچ کے دوران لاہور کے قذافی اسٹیڈیم میں کھیلا جائے گا۔

تین ون ڈے میچز ہر مشتمل سیریز کا پہلا میچ 29 مارچ کو کھیلا جائے گا جبکہ دوسرا 31 مارچ اور تیسرا اور آخری ون ڈے میچ 2 اپریل کو کھیلا جائے۔

ون ڈے سیریز کے تینوں میچز راولپنڈٰی کرکٹ اسٹیڈیم میں ہی کھیلے جائیں گے جبکہ دونوں ٹیموں کے درمیان واحد ٹی ٹوئنٹی میچ بھی 5 اپریل کو راولپنڈی میں ہی کھیلا جائے گا۔

دوسری جانب پاک آسٹریلیا ٹیسٹ سیریز کے لیے آن لائن ٹکٹ فروخت کے لیے پیش کردیے گئے ہیں، ٹیسٹ میچ کے لئے وی آئی پی کا ٹکٹ پانچ سو روپے جبکہ پریمئیم انکلوژر کا  ٹکٹ سو روپے کا رکھا گیا ہے۔