انٹرنیشنل کرکٹ کونسل (آئی سی سی) نے ٹی ٹوئنٹی کی نئی رینکنگ جاری کردی۔

آئی سی سی کی جانب سے جاری کردہ نئی رینکنگ کے مطابق انگلینڈ کے معین علی آل راؤنڈرز کی فہرست میں تیسری پوزیشن پر آگئے ہیں۔

افغانستان کے محمد نبی اور بنگلہ دیش کے شکیب الحسن بدستور بالترتیب پہلی اور دوسری پوزیشن پر موجود ہیں۔

آسٹریلیا کے گلین میکسویل اور سری لنکا کے ونندو ہسارنگا  ایک ایک درجہ تنزلی کے بعد بالترتیب چوتھی اور پانچویں پوزیشن پر چلے گئے ہیں۔

https://twitter.com/ICC/status/1488786832561160192

ٹی ٹوئنٹی بالنگ رینکنگ میں ابتدائی دس پوزیشنز میں کوئی تبدیلی واقع نہیں ہوئی ہے۔

سری لنکا کے ونندو ہسارنگا پہلی ، جنوبی افریقہ کے تبریز شمسی دوسری  ، انگلینڈ کے عادل رشید تیسری ، آسٹریلیا کے ایڈم زیمپا چوتھی  اور  افغانستان کے راشد خان پانچویں پوزیشن پر ہیں۔

آسٹریلیا کے جوش ہیزل ووڈ، افغانستان کے مجیب الرحمان، جنوبی افریقہ کے اینرچ نورکیا، پاکستان کے شاداب خان اور نیوزی لینڈ کے ٹم ساؤتھی بالترتیب چھٹی سے دسویں پوزیشن پر موجود ہیں۔

مزید پڑھیے: آئی سی سی ون ڈے رینکنگ، بابر اعظم بدستور پہلی پوزیشن پر براجمان

بیٹنگ کی فہرست میں صرف ایک تبدیلی واقع ہوئی ہے۔ بھارت کے لوکیش راہول ایک درجہ ترقی پاکر چوتھی پوزیشن پر آگئےاور انگلینڈ کے ڈیوڈ ملان ایک درجہ تنزلی سے پانچویں پوزیشن پر چلے گئے۔

پاکستان کے بابر اعظم، محمد رضوان اور جنوبی افریقہ کے ایڈن مارکرام بدستور بالترتیب پہلی سے تیسری پوزیشن پر براجمان ہیں۔

 آسٹریلیا کے ایرون فنچ، نیوزی لینڈکے ڈیوون کونوے ،جنوبی افریقہ کے ریسی وینڈر ڈسن، نیوزی لینڈ کے مارٹن گپٹل اور بھارت کے ویرات کوہلی بدستور بالترتیب چھٹی سے دسویں پوزیشن پر موجود ہیں۔