راولپنڈی: پاکستان اور آسٹریلیا کے درمیان ہوم سیریز کے حوالے سے سی پی او عمر سعید ملک نے راولپنڈی کرکٹ اسٹیڈیم کا دورہ کیا ہے۔

تفصیلات کے مطابق سی پی او عمر سعید ملک نے پاکستان اور آسٹریلیا کے درمیان ہوم سیریز کے حوالے سے راولپنڈی کرکٹ اسٹیڈیم کا دورہ کیا۔

اس موقع پر ان کے ہمراہ ایس ایس پی انوسٹی گیشن، ایس ایس پی آپریشنز، ایس پی راول، اے ایس پی نیوٹاؤن، ڈسٹرکٹ سیکیورٹی افسر اور دیگر افسران بھی شامل تھے۔

سی پی او عمر سعید ملک نے سیکیورٹی کے حوالے سے کرکٹ اسٹیڈیم، روٹ اور گردونواح کا جائزہ لیا جبکہ فول پروف سیکیورٹی انتظامات کے جامع پلان کے لئے متعلقہ افسران کو ہدایات دیں۔

اس موقع پر سی پی او راولپنڈی عمر سعید ملک کا کہنا تھا کہ کرکٹ اسٹیڈیم، گردونواح اور ٹیمز کی فول پروف سیکورٹی کے لیے تمام دستیاب وسائل بروئے کار لائے جائیں گے۔

انہوں نے کہا کہ پاکستان اور آسٹریلیا کرکٹ سیریز کے بہترین سیکیورٹی و ٹریفک انتظامات کو یقینی بنایا جائے گا۔

واضح رہے کہ آسٹریلیا اور پاکستان کے درمیان ٹیسٹ سیریز کا آغاز 4 مارچ سے راولپنڈی میں ہورہا ہے جو 8 مارچ تک جاری رہے گا۔

یاد رہے کہ  آسٹریلیا کرکٹ ٹیم 24 سال بعد پاکستان کا دورہ کررہی ہے جبکہ اس دورے میں 3 ٹیسٹ، 3 ونڈے اور 1 ٹی ٹوئنٹی میچ کھیلا جائے گا۔