لاہور: پی ایس ایل 7 کا فائنل آج ملتان سلطانز اورلاہور قلندرز کی ٹیموں کے درمیان کھیلا جائے گا۔

پاکستان سپر لیگ (پی ایس ایل) سیزن 7 اپنے اختتام کو پہنچ گیا ہے جس کا فائنل آج ملتان سلطانز اورلاہور قلندرز کی ٹیموں کے درمیان کھیلا جائے گا جو پاکستان کے مقامی وقت کے مطابق شام 7:30 بجے شروع ہوگا۔

دونوں ٹیموں کی ایونٹ میں پرفارمنس

ملتان سلطانز ایونٹ میں 11 میچز کھیل چکی ہے جس میں انہیں صرف ایک میچ میں شکست کا سامنا کرنا پڑا ہے جبکہ انہیں صرف لاہور قلندرز کے ہاتھوں ہی شکست ہوئی ہے۔

دوسری جانب لاہور قلندرز کی ٹیم نے ایونٹ میں 12 میچز کھیلے ہیں جس میں انہیں 8 میچز میں کامیابی حاصل ہوئی ہے جبکہ لاہور قلندرز کی ٹیم پلے آف مرحلے کا دوسرا ایلیمنٹری میچ اسلام آباد یونائیٹڈ کے خلاف جیت کر فائنل میں پہنچی ہے۔

کون کون سے کھلاڑی فارم میں ہیں؟

ملتان سلطانز

ملتان سلطان کے کپتان و وکٹ کیپر محمد رضوان اب تک فل فارم میں کھیل رہے ہیں اورانہوں نے 11 میچز میں 532 رنز اسکور کیے جبکہ محمد رضوان پی ایس ایل 7 میں سب سے زیادہ رنز بنانے والے کھلاڑیوں میں دوسرے نمبر پر موجود ہیں۔

ملتان کے شان مسعود بھی 11 میچز میں 459 رنز بناکر پی ایس ایل 7 میں سب سے زیادہ رنز بنانے والے کھلاڑیوں میں تیسرے نمبر پر موجود ہیں۔

علاوہ ازیں بولنگ میں ملتان سلطانز کے عمران طاہر، خوشدل شاہ اورشاہ نواز دھانی اپنی مخالف ٹیم کو گھومتی اورتیز گیندوں سے پریشان کررہے ہیں۔

عمران طاہر، خوشدل شاہ اورشاہ نواز دھانی نے ایونٹ میں اب تک 16،16 وکٹیں حاصل کی ہیں جبکہ تینوں کھلاڑی بہترین بولنگ کی کیٹیگری میں تیسرے نمبر پر موجود ہیں۔

لاہور قلندرز

اگر ہم لاہور قلندرز کی بات کریں تو ان کے اوپننگ بیٹسمین فخرزمان ہر طرف چھائے ہوئے ہیں، جنہوں نے ایونٹ میں سب سے زیادہ رنز، چوکے، چھکے اور باؤنڈریز لگائی ہیں اور آج بھی وہ اپنی فل فارم میں نظر آئیں گے۔

بولنگ میں شاہین شاہ آفریدی اور زمان خان نے اپنے مخالف بیٹسمین کو پریشان کررکھا ہے جبکہ لاہور کے کپتان شاہین شاہ آفریدی سب سے زیادہ وکٹیں لینے والی کیٹیگری میں 17 وکٹوں کے ساتھ دوسرے نمبر پر موجود ہیں۔

لاہور قلندرز کے زمان خان اس کیٹیگری میں 16 وکٹیں لے کر تیسرے نمبر پو موجود ہیں جبکہ راشد خان بھی اچھی فارم میں نظر آرہے ہیں۔

واضح رہے کہ دونوں ٹیمیں ایونٹ میں اب تک تین مرتبہ مدمقابل آچکی ہیں جس میں دو میچز ملتان سلطانز اورایک میچ لاہورقلندرز نے جیتا ہے۔

اس سے قبل پلے آف مرحلے کے میچ میں دونوں ٹیموں کے درمیان اچھا میچ دیکھنے کو ملا تھا جو ملتان سلطانز نے اپنے نام کرلیا تھا۔

آج بھی امید کی جارہی ہے دونوں ٹیموں کے درمیان اچھا کھیل دیکھنے کو ملے گا۔

یاد رہے کہ لاہور قلندرز اس سے قبل 2020 میں فائنل تک پہنچی تھی جس میں انہیں کراچی کنگز سے شکست ہوئی تھی جبکہ ملتان سلطانز صرف ایک مرتبہ فائنل تک رسائی حاصل کرچکی ہے۔

ملتان سلطانز نے پی ایس ایل 6 کے فائنل تک رسائی حاصل کی تھی جس میں انہوں نے پشاور زلمی کو شکست دے کر ایونٹ کا ٹائٹل اپنے نام کیا تھا۔