پاکستان کے لیجنڈری ٹیسٹ بیٹر اظہر علی کا کہنا ہے کہ وہ سابق آسٹریلوی کپتان اسٹیو وا سے بہت متاثر ہوئے ہیں۔

پاکستان کرکٹ بورڈ (پی سی بی) پوڈکاسٹ میں پاکستان اور آسٹریلیا کے درمیان ہونے والے مقابلوں سے متعلق  گفتگو کرتے ہوئے اظہر علی کا کہنا  تھا کہ  آسٹریلیا سے پاکستان کے ہمیشہ مشکل میچز ہوتے ہیں۔

انہوں نے کہا کہ آسٹریلوی ٹیم 90 کی دہائی سے اٹیکنگ کرکٹ کھیلتی ہے تاہم پاکستان نے انہیں آسٹریلیا جا کے بھی ہرایا ہے ۔

اظہر علی نے اپنے بچپن کی یادیں تازہ کرتے ہوئے بتایا کہ وہ ٹرائی نیشن سیریز دیکھنے کے لیے صبح صبح اٹھتے تھے جس میں سنسنی خیز میچز ہوا کرتے تھے۔ایسا میچ بھی دیکھا جس میں پاکستان نے 150 رنز کرکے بھی میچ جیت لیا۔

انہوں نے آسٹریلوی ٹیم کے اہم کھلاڑیوں سے متعلق کہا کہ ان کے پاس شین وارن، گلین میک گرا، بریٹ لی جیسے بالرز تھے۔

. @AzharAli_ shares his memories of #PAKvAUS ODI and Test matches in the 90s and talks about the Australian players he admires.#HarHaalMainCricket pic.twitter.com/mQL2NjZxtl

— Pakistan Cricket (@TheRealPCB) February 14, 2022

اظہر علی کا مزید کہنا تھا کہ وہ آسٹریلوی بلے باز اسٹیو وا سے بہت متاثر ہیں کیونکہ وہ ہمیشہ مشکل حالات میں رنز بناتے تھے۔

انہوں نے 1994 میں کراچی میں ہونے والے سنسنی خیز ٹیسٹ میچ کو یادگار قرار دیتے ہوئے کہا کہ ایک وقت تو ایسا لگا تھا کہ پاکستان میچ ہار جائے گالیکن آخر میں پاکستان کی جیت سے خوشی حاصل ہوئی۔

اس ٹیسٹ میں مارک ٹیلر کی ٹرپل سنچری کو بھی اظہر علی نے بطور کرکٹ فین سراہا۔

اظہر علی نے اسٹیو اسمتھ کے ساتھ اپنے موازنے پر کہا کہ ہم دونوں ہی شروع میں بالنگ کیا کرتے تھے لیکن اب ہم دونوں ہی اپنی ٹیم کے نمبر تین بیٹر ہیں۔