لاہور: پی سی بی نے پاکستان اور آسٹریلیا ہونے والی سیریز کے لیے میچ آفیشلز کا اعلان کردیا ہے۔

پاکستان اور آسٹریلیا کے درمیان ہونے والی سیریز کے لیے پی سی بی نے میچ آفیشلز کا اعلان کیا ہے جس کے مطابق میچ ریفری کے فرائض سری لنکا کے رنجن مدوگالے کو دیے گئے ہیں۔

تین ٹیسٹ میچز میں علیم ڈار کے ہمراہ احسن رضا آن فیلڈ امپائر ہوں گے جبکہ پہلے ون ڈے میں علیم ڈار اور آصف یعقوب آن فیلڈ امپائر ہوں گے۔

دوسرے ون ڈے میچ میں علیم ڈار اور احسن رضا ذمہ داریاں نبھائیں گے جبکہ تیسرے ون ڈے میچ میں علیم ڈار اور راشد ریاض آن فیلڈ امپائر ہوں گے۔

علاوہ ازیں واحد ٹی ٹونٹی میچ میں علیم ڈار اور احسن رضا آن فیلڈ امپائرنگ کے فرائض انجام دیں گے۔

واضح رہے کہ 24 برس بعد آسٹریلیا کی کرکٹ ٹیم پاکستان کا دورہ کررہی ہے جس میں تین ٹیسٹ، تین ون ڈے اور ٹی ٹوئنٹی میچ کھیلا جائے گا۔

اس سے قبل آسٹریلیا کرکٹ ٹیم نومرتبہ ٹیسٹ سیریز کے لیے دورہ کرچکی ہے، 2002 سے 2018 کے دوران دونوں ٹیموں کے درمیان کھیلی گئی 4 ٹیسٹ سیریز کی میزبانی پاکستان نے نیوٹرل مقامات پر کی تھی جس میں متحدہ عرب امارات اورانگلینڈ شامل ہیں۔