کرکٹ ورلڈکپ سپر لیگ کے پوائنٹس ٹیبل پر بنگلا دیش نے اپنی حکمرانی قائم کرلی ہے۔

تفصیلات کے مطابق بنگلا دیش نے افغانستان کو دوسرے ون ڈے میچ میں شکست دے کر  کرکٹ ورلڈکپ سپر لیگ کے پوائنٹس ٹیبل پر 100 پوائنٹس کے ساتھ پہلی پوزیشن حاصل کرلی ہے۔

بنگال  ٹائیگرز نے تین ون ڈے میچزکی سیریز کے دوسرے میچ میں افغانستان کو 88 رنز سے شکست دے کر ہوم گراؤنڈ پر سیریز میں 0-2 کی ناقابل تسخیر برتری حاصل کر لی ہے۔

بنگلادیش کی ٹیم نے انگلینڈ کو پیچھے چھوڑتے ہوئے پہلی پوزیشن حاصل  کی ہے۔ انگلینڈ فی الحال 95 پوائنٹس کے ساتھ دوسرے نمبر پر ہے۔

https://twitter.com/ICC/status/1497206929600430276

بنگلا دیش نے اب تک 14 میچز کھیل کر 10 میں فتح حاصل کی ہے جبکہ 4 میں اسے شکست کا سامنا کرنا پڑا ہے۔

100 پوائنٹس کے ساتھ اب بنگلادیش 2023 ورلڈ کپ کے لیے براہ راست کوالیفائی کرنے کی مضبوط پوزیشن میں آگیا ہے۔

واضح رہے کہ کرکٹ ورلڈکپ سپر لیگ پوائنٹس ٹیبل اس بات کا تعین کرے گا کہ کون سی ٹیمیں بھارت میں شیڈول 2023 کے مینز کرکٹ ورلڈکپ  کے لیے براہ راست کوالیفائی کریں گی۔

بطور میزبان براہ راست کوالیفائی کرنے والے بھارت  کے علاوہ  ٹاپ 7 ٹیمیں براہ راست ٹورنامنٹ کے لیے کوالیفائی کریں گی جبکہ باقی ٹیموں کو فائنل گروپ مرحلے میں جگہ بنانے کے لیے کوالیفائر ٹورنامنٹ کھیلنا پڑے گا۔