بھارت اگلے سال سے ویمنز آئی پی ایل شروع کرنے کی تیاری کررہا ہے جس کے لیے بی سی سی آئی نے بھی ہری جھنڈی دکھادی ہے۔

غیر ملکی خبر رساں ادارے کے مطابق بی سی سی آئی اگلے سال 2023 سے چھ ٹیموں پر مشتمل ویمنز آئی پی ایل کے انعقاد کی تیاری کررہا ہے۔

اس حوالے سے گذشتہ روز ممبئی میں آئی پی ایل کی گورننگ کونسل کا اجلاس ہوا جس میں 2023 سے آئی پی ایل کے انعقاد کے لیے کوششیں کرنے کا فیصلہ کیا گیا ہے۔

بی سی سی آئی کے صدر سارو گنگولی کا کہنا ہے کہ اے جی ایم نے منظوری دے دی ہے جس کے بعد ہم آئی پی ایل کو اگلے سال سے شروع کرنے کے منتظر ہیں۔

آئی پی ایل کے چیئرمین برجیش پٹیل نے واضح کیا ہے کہ اس سیزن میں تین ویمنز ٹیموں کے مینز کے آئی پی ایل پلے آف کے ساتھ چار میچز بھی ہوں گے۔

واضح رہے کہ بھارتی کرکٹ بورڈ ابتدائی مرحلے میں پانچ یا چھ ٹیموں کی منصوبہ بندی کررہا ہے جبکہ مینز کی موجود فرنچائزز کو ویمنز کی آئی پی ایل کی ٹیموں کو خریدنے کا پہلا موقع دیا جائے گا۔

دوسری جانب مینز آئی پی ایل کی چار فرنچائزز کے مالکان نے ویمنز ٹیمیں خریدنے میں دلچسپی ظاہر کی ہے۔

خیال رہے کہ بھارتی کرکٹ بورڈ پر کافی عرصے سے ویمنز آئی پی ایل شروع کرنے کا دباؤ تھا کیونکہ پاکستان اورویسٹ انڈیز پہلے ہی ویمنز لیگ شروع کرنے کا اعلان کرچکے ہیں۔