لاہور: پاکستان ٹیم کے ہیڈ کوچ ثقلین مشتاق کا کہنا ہے کہ کراچی ٹیسٹ کا جس طرح اختتام ہوا وہ تاریخی لمحہ تھا۔

پاکستان ٹیم کے ہیڈ کوچ ثقلین مشتاق کا ورچوئل پریس کانفرنس کرتے ہوئے کہنا تھا کہ دوسرے ٹیسٹ کا جس طرح اختتام ہوا، وہ تاریخی لمحہ تھا۔ لوگ ناممکن سمجھ رہے تھے لیکن پاکستانی پلیئرز نے اسے ممکن کر دکھایا۔

انہوں نے کہا کہ ایشز سیریز جیتنے والی آسٹریلوی ٹیم کیخلاف ایک ہزار گیندیں کھیلنا بڑی بات ہے، میں خود کو خوش قسمت سمجھتا ہوں۔ جس طرح لڑکوں نے آسٹریلیا کو جواب دیا بہترین تھا۔

ان کا کہنا تھا کہ دوسرے ٹیسٹ کی وکٹ ٹیسٹ کرکٹ کے معیار کے مطابق تھی اور دوسرے ٹیسٹ میں دونوں ٹیموں کا مکمل ٹیسٹ ہوا۔

یاسر شاہ فٹنس میں پیچھے تھے، اس لیے منتخب نہیں ہوئے کیونکہ یاسر شاہ کی میچ پریکٹس بھی نہیں تھی لیکن اسے مس تو کررہے ہیں۔

ہیڈ کوچ کا کہنا تھا کہ فواد عالم کا بیٹنگ سٹانس رنز کی رکاوٹ میں نہیں ہے، فواد عالم کو پہلی اننگز میں بہت اچھا گیند پڑا جس سے وہ آؤٹ ہوئے۔

ثقلین مشتاق نے کہا کہ تیسرے ٹیسٹ میں ٹف کرکٹ کھیلنا پڑے گی جس کیلئے تیار ہیں، شان مسعود سمیت جو لوگ اسکواڈ میں نہیں وہ بھی پلان کا حصہ ہیں۔

انہوں نے مزید کہا کہ ہم بھی قذافی اسٹیڈیم میں رزلٹ چاہتے ہیں کیونکہ خالی باتیں اچھی نہیں لگتیں۔