لاہور: قومی ٹیم کے بیٹر فخر زمان کا کہنا ہے کہ بابر اعظم نے پلیئرز کو واضع پیغام دیا ہے کہ تینوں میچز جیتنے ہیں۔

لاہور میں پریس کانفرنس کرتے ہوئے قومی ٹیم کے کھلاڑی فخر زمان کا کہنا تھا کہ آسٹریلیا مضبوط ٹیم ہے لیکن پاکستان کو ہوم گراؤنڈ کا فائدہ حاصل ہے۔

فخر زمان نے کہا کہ ہماری کوشش ہوگی کہ تمام ون ڈے جیتیں، آسٹریلوی ٹیم کے بڑے نام نہیں ہیں جس سے فرق تو پڑتا ہے مگر جو ٹیم ایرن فنچ کے پاس ہے اسے بھی کمزور نہیں کہہ سکتے اور نا ہی ہلکا لے سکتے ہیں۔

ان کا کہنا تھا کہ لاہور میں ہمیشہ اوس فیکٹر ہوتا ہے، مگر اتنا فرق نہیں پڑے گا۔ لاہور میں زیادہ رنز بنتے ہیں اور 300 کے قریب ٹارگٹ اچھا ہوگا۔

آسٹریلیا کے خلاف ٹیسٹ سیریز میں اچھی کرکٹ ہوئی جس کی وجہ سے مجھے مزہ آیا۔ بابر اعظم نے پلیئرز کو واضع پیغام دیا ہے کہ تینوں میچز جیتنے ہیں۔

انہوں نے مزید کہا کہ کپتان بابر اعظم کلئیر ہیں کہ ون ڈے سیریز 3-0 سے جیتنی ہے۔

واضح رہے کہ پاکستان اور آسٹریلیا کے درمیان وائٹ بال سیریز کا آغاز 29 مارچ سے ہونے جارہا ہے، وائٹ بال میچز میں 3 ون ڈے پر مشتمل سیریز اور ایک ٹی ٹوئنٹی میچ کھیلا جائے گا۔

پہلا ون ڈے 29 مارچ کو کھیلا جائے گا اور دوسرا 31 مارچ کو جبکہ تیسرا اورآخری ون ڈے 2 اپریل کو کھیلا جانا ہے۔

دونوں ٹیموں کے درمیان واحد ٹی ٹوئنٹی میچ 5 اپریل کو ہوگا جبکہ وائٹ بال کے تمام میچز لاہور کے قذافی اسٹیڈیم میں کھیلے جائیں گے۔