پاکستان کو اگلے سال ہونے 40 پلس سینئرز کرکٹ ورلڈ کی میزبانی مل گئی ہے جو اگلے سال 23 ستمبر سے 8 اکتوبر تک کھیلا جائے گا۔

ملک میں کرکٹ کے شائقین کے لیے بڑی خوشخبری آگئی ہے کیونکہ پاکستان کو اگلے سال ہونے والے 40 پلس سینئرز کرکٹ ورلڈ کپ کے افتتاحی ایڈیشن کی میزبانی مل گئی ہے۔

ٹورنامنٹ میں 14 رجسٹرڈ ٹیموں میں سے 12 ٹیمیں حصہ لیں گی جن میں پاکستان، بھارت، آسٹریلیا، انگلینڈ، نیوزی لینڈ، ویسٹ انڈیز، جنوبی افریقہ، سری لنکا، کینیڈا، امریکا، زمبابوے، ویلز، نمیبیا اور متحدہ عرب امارات (یو اے ای) شامل ہیں۔

ورلڈکپ سے قبل مقابلوں کے حتمی ڈراز سے 12 ٹیموں کا انتخاب کیا جائے گا جبکہ اس حوالے سے پاکستان ویٹرنز کرکٹ ایسوسی ایشن نے بھی تصدیق کردی ہے۔

 پاکستان ویٹرنز کرکٹ ایسوسی ایشن کے چیئرمین فواد اعجاز خان کا کہنا تھا کہ سینئرز ورلڈکپ کی میزبانی ملنا پاکستان کے لیے ایک اعزاز کی بات ہے، میگا ایونٹ کو شایان شان انداز میں منعقد کیا جائے گا۔

ان کا کہنا تھا کہ سینئرز ورلڈکپ کے میچز کراچی کے 6 مختلف گراؤنڈ میں کھیلے جائیں گے اور ہر میچ کی ایک اننگز 45 اوورز پر مشتمل ہوگی جو ڈے اینڈ نائٹ میں کھیلے جائیں گے۔

چیئرمین فواد اعجاز خان کا مزید کہنا تھا کہ سیمی فائنلز اور فائنل براہ راست ٹیلی کاسٹ کیے جائیں گے جس میں 40 سال سے زائد عمر کے معروف سابق انٹرنشنل کرکٹرز بھی ایونٹ کی رونق کو بڑھائیں گے۔

واضح رہے کہ قومی ٹیم کی نمائندگی شاہد خان آفریدی، شعیب ملک، یونس خان اور محمد حفیظ سمیت دیگر قومی اسٹارز کھلاڑی کریں گے۔