سابق بھارتی کھلاڑی محمد کیف نے قومی ٹیم کے کپتان بابر اعظم کو ایشیا کا بہترین کھلاڑی قرار دے دیا ہے۔

محمد کیف کا اسپورٹس کیڈا کرکٹ میں شائقین کے سوالوں کا جواب دیتے ہوئے کہنا تھا کہ پاکستان میں کرکٹ کا حقیقی ٹیلنٹ موجود ہے۔

ان کا کہنا تھا کہ پاکستان میں بابر اعظم موجود ہیں، مجھے شاہین شاہ آفریدی بہت پسند ہے، یہ لوگ اچھا کھیل رہے ہیں۔

انہوں نے کہا کہ بابر اعظم بہت اچھا کھیل رہے ہیں اور مسلسل کارکردگی کا مظاہرہ کررہے ہیں، ان کی پرفارمنس کے حساب سے ان کی تعریف کم کی گئی ہے لیکن وہ پاکستان کے لیے ایک انمول اسٹار ہیں۔

محمد کیف نے بابر اعظم اور بھارتی کھلاڑی جسپریت کو ایشیا کے موجودہ بہترین کھلاڑی قرار دیا ہے۔

اس سے قبل بھارتی کھلاڑی کا بابر اعظم کی آسٹریلیا کے خلاف دوسرے ون ڈے میں 74 گیندوں پر سنچری کی تعریف کرتے ہوئے ٹوئٹر پر کہنا تھا کہ ’ بابر کے پاس مہارت، تکنیک اور جگر ہے‘۔

Babar has skills, technique and jigar. The perfect mix when you are chasing a big total. ⁦⁦@babarazam258⁩ pic.twitter.com/jL0bgaEyM1

— Mohammad Kaif (@MohammadKaif) April 1, 2022

واضح رہے کہ قومی ٹیم کے کپتان بابر اعظم اس وقت واحد بلے باز ہیں جو ون ڈے اور ٹی ٹوئنٹی کی فہرست میں پہلے نمبر پر موجود ہیں جبکہ ٹیسٹ میں ان کا پانچواں نمبر ہے۔