قومی ٹیم کے ہیڈ کوچ ثقلین مشتاق کا کہنا ہے کہ پاکستانی اسپن بولرز کو اپنی کارکردگی میں بہتری لانی ہوگی۔

قومی ٹیم کے ہیڈکوچ ثقلین مشتاق کا ورچوئل پریس کانفرنس کرتے ہوئے کہنا تھا کہ پاکستانی اسپن بولرز کو اپنی کارکردگی میں بہتری لانی ہوگی کیونکہ گذشتہ 15 سالوں میں غیر ایشیائی ٹیموں نے اسپنرز کا انداز میں سامنا کرنے کے لیے اچھا ہوم ورک کیا ہے۔

ان کا کہنا تھا کہ انگلینڈ میں تو مصنوعی اسپن پچز تیار کی گئی ہیں، جوروٹ نے بھارت جبکہ اسٹیو اسمتھ، ٹریوس ہیڈ اور عثمان خواجہ نے پاکستان میں بہت اچھی تکنیک استعمال کرکے خوب رنز بنائے ہیں۔

انہوں نے کہا کہ اب ماضی جیسی صورت حال نہیں مگر میں اسے پاکستانی اسپنرز کی کارکردگی توقعات کے مطابق نہ ہونے کا جواز بناکر پیش نہیں کررہا، ہمیں اس شعبے میں مزید کام کرنے کی ضرورت ہے اور فارغ ہونے کے بعد ہم اس کے لیے بھرپور پلان بھی تیار کریں گے۔

ہیڈ کوچ کا کہنا تھا میں یہ نہیں کہتا کہ انہوں نے بری بولنگ کی لیکن انہیں اپنی باؤلنگ ورائٹی مزید بڑھانے کی ضرورت ہوگی، ہمارے بولرز کو اپنی بولنگ میں مزید ویری ایشن شامل کرنے کے لیے کچھ کرنے کی ضرورت ہے۔

انہوں نے مزید کہا کہ جب ٹیم کو پہلے ون ڈے میں شکست ہوئی تو کھلاڑیوں نے نیا عزم کیا اور یہی وجہ تھی کہ دوسرے ون ڈے میں ٹیم بڑا ہدف حاصل کرنے میں کامیاب رہی جبکہ ٹیم نے تیسرے ون ڈے میں ذہنی اور تکنیکی ہوم ورک مکمل کرنے کے بعد حریف ٹیم کو دونوں شعبوں میں آؤٹ کلاس کیا۔

واضح رہے کہ پاکستان اور آسٹریلیا کے درمیان 3 ٹیسٹ اور3 ون ڈے میچز پر مشتمل سیریز کھیلی جاچکی ہے جس میں ٹیسٹ سیریز آسٹریلیا اور ون ڈے سیریز پاکستان کے نام رہی ہے۔

دونوں ٹیموں کے درمیان واحد ٹی ٹوئنٹی میچ آج رات ساڑھے 8 بجے قذافی اسٹیڈیم میں کھیلا جانا ہے جس کے لیے ٹیموں نے تیاری مکمل کرلی ہے۔