آئی سی سی ویمنز ورلڈ کپ کی فاتح ٹیم آسٹریلیا نے آئی سی سی پر پرائز منی بڑھانے کے لیے زور دیا ہے۔

خبر رساں ادارے کے مطابق آسٹریلوی بیٹر ایلیسا ہیلی کا کہنا ہے کہ پرائزمنی میں اضافہ ہونا چاہیے، پرائز منی کی تقسیم کی بنیاد کو بڑھانے کی ضرورت ہے۔

آسٹریلوی ویمنز کرکٹ ٹیم کی کپتان میگ لیننگ کا کہنا ہے کہ پرائز منی میں اضافے اور اس کی تقسیم بڑھانے کے مطالبے کو سپورٹ کرتی ہوں کیونکہ چھوٹے اور ایمرجنگ ممالک میں ویمن کرکٹ کی ڈیولپمنٹ کی بہت گنجائش ہے۔

انہوں نے کہا کہ ورلڈ کپ میں پاکستان اور بنگلادیش کی ٹیموں نے اپنی شاندار صلاحیتوں کا مظاہرہ کیا، ان پر توجہ دینے کی ضرورت ہے جنہوں نے کوالیفائی نہیں کیا جیسا کہ سری لنکا۔

آسٹریلوی کپتان کا کہنا تھا کہ ہم نہیں چاہتے کہ ہمیشہ دو ٹیموں کے پاس ہی سب کچھ چلا جائے، مقابلے کی فضا کو بڑھانے کی ضرورت ہے۔

انہوں نے مزید کہا کہ امید کرتے ہیں کہ آئی سی سی اس حوالے سے ضرور سوچ کر پلان کرے گی۔

واضح رہے کہ آئی سی سی کو ویمنز ورلڈ کپ کی پرائز منی کو لے کر شدید تنقید کا نشانہ بنایا جارہا ہے جبکہ ویمنز ورلڈ کپ کی فاتح ٹیم کو مینز ورلڈ کپ کے مقابلے میں پرائز منی کا ایک تہائی حصہ ملا ہے۔

یا رہے کہ 2019 مینز ورلڈ کپ کی فاتح ٹیم انگلینڈ کو 4 ملین امریکی ڈالر انعامی رقم ملی تھی جبکہ 2022 ویمنز ورلڈ کپ کی فاتح ٹیم کو 1.3 ملین امریکی ڈالر کا انعام ملا ہے۔