قومی ٹیم کے کپتان بابر اعظم کا کہنا ہے کہ شاہین شاہ آفریدی میں ایک خداداد صلاحیت ہے جو بلے بازوں کو مشکل میں ڈال دیتی ہے۔

شاہین شاہ آفریدی کے پہلے اوور کے بارے میں اظہار خیال کرتے ہوئے قومی ٹیم کے کپتان بابر اعظم کا کہنا تھا کہ شاہین شاہ کو سوئنگ کے ساتھ یارکر کرنے میں مکمل مہارت حاصل ہے۔

کپتان بابر اعظم نے کہا کہ شاہین آفریدی لینتھ بال کے ساتھ یارکر کرتے ہیں اور یہ ان کا ٹیلنٹ محنت اور پلان ہوتا ہے کہ پہلے اوور میں وکٹ لے کر دیتے ہیں۔

بابراعظم نے مزید کہا کہ شاہین شاہ آفریدی میں یہ ایک خداداد صلاحیت ہے جو بلے بازوں کو مشکل میں ڈال دیتی ہے۔

اس حوالے سے قومی ٹیم کے وکٹ کیپر محمد رضوان نے کہا کہ ہمیں توقع ہوتی ہے کہ شاہین آفریدی نے پہلے اوور میں کچھ نہ کچھ کرنا ہے۔ ہم سب ہی نہیں بلکہ مینجمنٹ، فینز اور دیگر کھلاڑی بھی وکٹ کے منتظر ہوتے ہیں۔

اس حوالے سے آسٹریلوی کھلاڑی لبوشین نے بھی مجھ سے پوچھا تھا کہ شاہین آفریدی کے پہلے اوور میں فل ٹاس کا کیا مقصد ہوتا ہے جبکہ شاہین شاہ ایک مقصد کے تحت فال ٹاس کرتے ہیں۔

شاہین شاہ آفریدی کا اپنے پہلے اوور کے بارے میں گفتگو کرتے ہوئے کہنا تھا کہ نئے بال کو ایسے استعمال کرنا چاہتا ہوں کہ جس سے ٹیم کو فائدہ ہو۔

ان کا کہنا تھا کہ میری یہی کوشش ہوتی ہے کہ اوپر جلدی آؤٹ کروں کیونکہ اوپر سے ایک دو وکٹیں گرنے سے دوسری ٹیم ڈاؤن ہو جاتی ہے۔

واضح رہے کہ پاکستان اور آسٹریلیا کے درمیان واحد ٹی ٹوئنٹی میچ آج لاہور کے قذافی اسٹیڈیم میں کھیلا جائے گا جو پاکستانی وقت کے مطابق رات ساڑھے 8 بجے شروع ہوگا۔