آسٹریلوی کھلاڑی ایلیکس کیری کا کہنا ہے کہ میں نہیں سمجھتا کہ سری لنکا کے دورے کے حوالے سے کوئی خدشات ہیں۔

آسٹریلیا کرکٹ ٹیم کے وکٹ کیپر و بیٹر ایلیکس کیری کا کہنا ہے کہ سری لنکا کی صورت حال پر ہمیں متعدد بار بریفنگ دی گئی ہے لیکن ہم سری لنکا میں محفوظ ہوں گے۔

ایلیکس کیری نے کہا کہ ہمیں یقین ہے کہ سری لنکا میں سیکیورٹی کے حوالے سے تمام اقدامات کیے جائیں گے، میں نہیں سمجھتا کہ سری لنکا کے دورے کے حوالے سے کوئی خدشات ہیں۔

انہوں نے مزید کہا کہ سری لنکن عوام کے چہروں پر مسکراہٹ دیکھ کر ہمیں اچھا لگے گا۔

واضح رہے کہ اس سے قبل آسٹریلین کرکٹرز ایسوسی ایشن کے سربراہ ٹوڈ گرین برگ نے کہا تھا کہ آسٹریلیا کے اسکواڈ میں شامل کھلاڑیوں نے سری لنکا کے آئندہ دورے کے حوالے سے خدشات کا اظہار کیا ہے۔

ان کا کہنا تھا وہ دورے کو آگے بڑھانے کے فیصلے کی حمایت کرتے ہیں تاہم کھلاڑی سری لنکا کی صورتحال سے بہت واقف ہیں۔

انہوں نے مزید کہا تھا کہ ’یہ کہنا مناسب ہے کہ سری لنکا میں جاری بحران کے دوران دورہ مشکل ہے جبکہ خاص کر ایسے حالات میں جب سری لنکن عوام کو خوراک کی بڑھتی ہوئی قیمتیں، بجلی کی بندش، ایندھن اور راشن کی کمی جیسے حالات کا سامنا ہو۔

یاد رہے کہ آسٹریلیا کرکٹ ٹیم کے دورہ سری لنکا کا آغاز 7 جون سے ہوگا۔ آسٹریلیا کے دورہ سری لنکا کے دوران 3 ٹی ٹوئنٹی اور 5 ون ڈے میچز پر مشتمل سیریز کھیلی جائیں گی۔ علاوہ ازیں 2 ٹیسٹ میچز کی سیریز بھی شیڈولڈ ہے۔