سری لنکا کے خلاف ون ڈے اور ٹی ٹوئنٹی سیریز کے لیے قومی ویمنز ٹیم کے فٹنس ٹیسٹ گذشتہ روز مکمل ہوگئے ہیں۔

قومی ویمنز کرکٹ ٹیم کا تربیتی کیمپ آج سے کراچی کے نیشنل اسٹیڈیم میں حنیف محمد ہائی پرفارمنس سینٹر میں شروع ہوگا جو 18 مئی تک جاری رہے گا۔

تربیتی کیمپ میں آج اسکواڈ پریکٹس سیشن میں حصہ لے گا جبکہ ہیڈ کوچ ڈیوڈ ہیمپ دوپہر ساڑھے بارہ بجے میڈیا سے گفتگو کریں گے۔

کیمپ 26 کھلاڑیوں پر مشتمل ہوگا جبکہ 11، 14 اور 17 مئی کو تین پریکٹس ون ڈے میچز کھیلے جائیں گے اور دو پریکٹس ٹی ٹوئنٹی میچز 12 اور 15 مئی کو ہوں گے۔

بورڈ ترجمان کا کہنا ہے کہ کیمپ کے دوران کھلاڑیوں کی نیٹ اور فیلڈنگ سیشنز ہوں گے جس میں ان کی کارکردگی بہتر بنانے پر توجہ دی جائے گی جبکہ 13 اور 16 مئی کو انہیں آرام کا موقع دیا جائے گا۔

جمعرات کی صبح 11 بجے سے ڈھائی بجے تک پریکٹس ٹی ٹوئنٹی میچ ہوگا جبکہ 18 مئی کو قومی ویمنز ٹیم کی صبح 9:30 سے دوپہر 12:45 تک پریکٹس ہوگی۔

واضح رہے کہ جن کھلاڑیوں کو تربیتی کیمپ مین طلب کیا گیا ہے، ان میں انعیم امین، ایمن انور، عائشہ بلال، انوشہ ناصر، عائشہ ظفر اورعائشہ نسیم شامل ہیں۔

علاوہ ازیں غلام فاطمہ گل فیروزہ، کائنات امتیاز، ارم جاوید، منیبہ علی صدیقی، نتالیہ پرویز، نجیہ علوی، ندا ڈار، عمیمہ سہیل، صدف شمس، رامین شمیم، شوال ذوالفقار، سعدیہ اقبال، سدرہ امین، سدرہ نواز، طوبہ حسن، تسمیہ رباب، یسریٰ عامر، امِ ہانی اوروحیدہ اختر کو تربیتی کیمپ میں طلب کیا گیا ہے۔