لاہور: پاکستان کرکٹ بورڈ (پی سی بی) کے کنڈیشنگ کیمپ کا دوسرا مرحلہ نیشنل ہائی پرفارمنس سینٹر میں شروع ہو گیا ہے۔

تفصیلات کے مطابق لاہور کے نیشنل ہائی پرفارمنس سینٹر میں کنڈیشنگ کیمپ کا دوسرا مرحلہ شروع ہوگیا ہے جس میں شیڈول کے مطابق قومی ٹیم کے کوچ ثقلین مشتاق اور عبدالرزاق نے تربیتی کیمپ میں موجود 45 کھلاڑیوں کو لیکچر دیا۔

یہ بات قابل ذکر ہے کہ عماد وسیم اور یاسر شاہ جیسے کھلاڑی بھی کنڈیشنگ کیمپ کے دوسرے مرحلے میں شرکت کر رہے ہیں جبکہ ان دونوں کھلاڑیوں نے جم ورک کے ساتھ ساتھ فیلڈنگ ڈرلز میں بھی حصہ لیا ہے۔

کیمپ کا بنیادی مقصد آنے والے سیزن کے لیے کھلاڑیوں کی فٹنس اور فیلڈنگ کو بہتر بنانا اور ان کے کھیل میں پائے جانے والے نقائص کو دور کرنا ہے جبکہ کیمپ کے دوران دو پریکٹس میچز بھی شیڈول کیے جا رہے ہیں۔

واضح رہے کہ قومی ٹیم کا ویسٹ انڈیز کے خلاف ون ڈے ہوم سیریز کا آغاز 8 جون سے ہونے جارہا ہے جس کا تربیتی کیمپ یکم جون سے لاہور میں ہی لگے گا۔

تربیتی کیمپ کے لیے کھلاڑی یکم جون کو لاہور میں رپورٹ کریں گے جبکہ انگلش کاؤنٹی میں مصروف کھلاڑی بھی یکم جون کو ہی رپورٹ کریں گے۔ تربیتی کیمپ میں کھلاڑیوں کو بیٹنگ، بولنگ اور فیلڈنگ کی بھرپور مشقیں کروائی جائیں گی۔

دوسری جانب ہوم سیریز کے لیے تاحال وینیو فائنل نہیں ہوسکا ہے کیونکہ پی سی بی انتظامیہ کو ملتان میں کروانے کی تو اجازت مل گئی ہے لیکن تحریری اجازت کا اب بھی انتظار ہے جس کے لیے آج کا امکان ظاہر کیا جارہا ہے۔

خیال رہے کہ ویسٹ انڈیز کی میزبانی کے لیے پہلی ترجیح راولپنڈی تھی لیکن کشیدہ سیاسی صورتحال کی وجہ سے بیک اپ کے طور پر ملتان کو رکھا گیا تھا۔