گجرات ٹائٹنس کے کپتان ہاردک پانڈیا نے آئی پی ایل جیتنے کے بعد ٹی ٹوئنٹی ورلڈ کپ پر اپنی نظریں جمالیں ہیں۔

گذشتہ روز انڈین پریمئر لیگ (آئی پی ایل) سیزن 15 کا فائنل میچ راجھستان رائلز اور پہلی مرتبہ ایونٹ کھیلنے والی ٹیم گجرات ٹائٹنس کے درمیان کھیلا گیا۔

اس میچ میں گجرات ٹائٹنس نے 7 وکٹوں سے کامیابی حاصل کرکے ٹرافی اپنے نام کی ہے جبکہ گجرات ٹائٹنس کی قیادت ہاردک پانڈیا کررہے تھے۔

ان ہی کی قیادت میں ڈیبیو کرنے والی ٹیم نے کامیابی حاصل کی جبکہ انہوں نے یہ بھی ثابت کیا کہ وہ کمر کی چوٹ سے مکمل طور پر صحتیاب ہوچکے ہیں۔

میچ کے بعد ان سے مستقبل کے بارے میں سوال کیا گیا جس پر ان کا کہنا تھا کہ ’میں بالکل بھارت کے لیے ورلڈ کپ جیتنا چاہتا ہوں، چاہے کچھ بھی ہوجائے‘۔

انہوں نے کہا کہ میرے پاس جو کچھ بھی ہے میں وہ سب دینے کو تیار ہوں، میں ہمیشہ اس ہی قسم کا آدمی رہا ہوں جو اپنی ٹیم کو ترجیح دے۔ میرا مقصد آسان ہے کہ میری ٹیم ہمیشہ سب سے آگے رہے۔

ان کا کہنا تھا کہ ملک کی نمائندگی کرنا میرے لیے ہمیشہ خوشی کا باعث ہوگی، میں طویل مدتی اور مختصر مدت کے فارمیٹس میں کسی بھی قیمت پر ورلڈ جیتنا چاہتا ہوں۔

خیال رہے کہ ہاردک پانڈیا گجرات ٹائٹنس کی قیادت سے قبل 4 مرتبہ ممبئی انڈینز کی جانب سے آئی پی ایل کھیل چکے ہیں۔

ہاردک پانڈیا کہتے ہیں میں خود کو بہت خوش قسمت سمجھتا ہوں کیونکہ میں نے پانچ مرتبہ فائنل کھیلے ہیں اور پانچوں مرتبہ ہی ٹرافی اپنے نام کی ہے۔

انہوں نے مزید کہا کہ یہ بات قابل فخر ہے کہ ایک نئی فرنچائز جو پہلی مرتبہ ایونٹ کھیل رہی ہو اور وہ اپنے پہلے ہی سیزن میں چیمپئن بن جائے۔

واضح رہے کہ سابق بھارتی کپتان سینل گواسکر سمیت کئی نامور کھلاڑیوں نے ہاردک پانڈیا کی قیادت کو سراہتے ہوئے گجرات کی جیت میں ان کے کردار کو اہم قرار دیا ہے۔