نیوزی لینڈ کے سابق کپتان برینڈن میک کولم کو انگلینڈ کے ٹیسٹ کوچ کے لیے مضبوط امیدوارسمجھا جارہا ہے جبکہ اس دوڑ میں گیری کرسٹن اور کالنگ ووڈ بھی شامل ہیں۔

برطانوی میڈیا رپورٹس کے مطابق نیوزی لینڈ کے سابق کپتان برینڈن میک کولم انگلینڈ کے ٹیسٹ کوچ کا عہدہ سنبھال سکتے ہیں کیونکہ انہیں اس عہدے کے لیے مضبوط امیدوار سمجھا جارہا ہے۔

بعد ازاں انگلینڈ اور ویلز کرکٹ بورڈ نے ٹیسٹ اور وائٹ بال کوچز کے لیے الگ الگ درخواستیں طلب کی تھیں۔

یہ بھی پڑھیں: ایشز سیریز میں ناکامی، ہیڈ کوچ کو بھی فارغ کر دیا گیا

رپورٹس میں کہا گیا ہے کہ 40 سالہ میک کولم جو اس وقت انڈین پریمئر لیگ میں کولکتہ نائٹ رائیڈرز کے ساتھ منسلک ہیں، وہ انگلینڈ کے ٹیسٹ کوچ کے عہدے کے خواہشمند ہیں جبکہ اسی ہفتے ان کا اعلان بھی متوقع ہے۔

اس عہدے کی دوڑ میں جنوبی افریقہ اوربھارت کے سابق ہیڈ کوچ گیری کرسٹن بھی شامل ہیں جبکہ کالنگ ووڈ کو بھی امیدوار سمجھا جارہا ہے۔

واضح رہے کہ برینڈن میک کولم نے اپنے ٹیسٹ کیریئر میں 101 ٹیسٹ میچز کھیلیں ہیں جس میں انہوں نے 6 ہزار453 رنز اسکور کیے ہیں۔

فروری 2016 میں انہوں نے اپنا آخری ٹیسٹ میچ کرائسٹ چرچ کے میدان میں آسٹریلیا کے خلاف کھیلا تھا جس میں انہوں نے تیز ترین 54 گیندوں پر سنچری اسکور کی تھی جبکہ انہوں نے اپنے ٹیسٹ کیریئر میں 12 سنچریاں اور31 نصف سنچریاں بھی اسکور کی ہیں۔

خیال رہے کہ انگلینڈ اور نیوزی لینڈ کی ٹیموں کے درمیان اگلے ماہ جون میں تین میچز کی سیریز کھیلی جائے گی جس کی میزبانی انگلینڈ کرے گا۔