جنوبی افریقہ کے اسپنر کیشو مہاراج کو حالیہ شاندار پرفارمنس کی بنیاد پر اپریل 2022 کے لیے آئی سی سی مینز پلیئر آف دی منتھ قرار دے دیا گیا ہے۔

کیشو مہاراج نے بنگلادیش کے خلاف دو میچز کی ٹیسٹ سیریز میں شاندار کارکردگی کا مظاہرہ کرتے ہوئے جنوبی افریقہ کے ہی سمن ہارمر اور اومان کے اپنر جتندر سنگھ کو شکست دے دی ہے۔

انہیں بنگلادیش کے خلاف ٹیسٹ سیریز میں 16 وکٹیں حاصل کرنے کی بنیاد پر پلیئر آف دی منتھ قراردیا گیا ہے۔ انہوں نے ڈربن میں ہونے والے پہلے ٹیسٹ میچ میں تباہی مچادی تھی جبکہ میچ کی پہلی اننگ میں انہیں کوئی کامیابی نہیں ملی تھی لیکن دوسری اننگ میں انہوں نے بنگالی ٹائیگرز کی دھجیاں بکھر دی تھیں۔

میچ کی دوسری اننگ میں بنگلادیش کو جیت کے لیے 274 رنز درکار تھے جب کیشو مہاراج نے اپنی سوئنگ کو جادو چلایا اور 7 وکٹیں حاصل کی تھیں۔

دوسرے میچ میں بھی انہوں نے اپنی گیند سے مخالف ٹیم کے چھکے اڑادیے تھے اور اس میچ میں بھی انہوں نے دوسری اننگ میں 7 شکار کیے جبکہ انہیں میچ اور سیریز کا بہترین کھلاڑی بھی قرار دیا گیا تھا۔

کیشو مہاراج نے  پورٹ الزبتھ میں ہونے والے دوسرے ٹیسٹ میں 84 رنز اسکور کیے تھے جبکہ یہ سیریز جنوبی افریقہ نے 0-2 سے اپنے نام کی تھی۔

کیشو مہاراج کو یہ اعزاز دینے والے ووٹنگ پینل نے ان کی خوب تعریف کی ہے، ووٹنگ پینل کے رکن جے پی ڈومینی کہتے ہیں کیشو مہاراج اس اعزاز کے مستحق تھے کیونکہ انہوں نے ہمت اورعزم کا مظاہرہ کیا ہے۔

ایک اور ساتھی ووٹنگ پینل کے رکن نے جنوبی افریقہ کی سیریز میں کامیابی کا اہم رکن کیشو مہاراج کو قرار دیا ہے۔ انہوں نے کہا کہ میچ کے اہم وقت میں وکٹیں حاصل کرنا غیر معمولی ہے جبکہ دیر سے رنز ان کی کامیابی کی اہم وجہ بنی۔

واضح رہے کہ آئی سی سی نے اپریل کے لیے پلیئر آف دی منتھ کی نامزدگیوں کا اعلان کیا تھا جس میں کیشو مہاراج کے ساتھ ساتھ ان کے ساتھی کھلاڑی سمن ہارمر اور اومان کے جتندر سنگھ شامل تھے۔