نیوزی لینڈ کرکٹ بورڈ نے گذشتہ سال پاکستان کا اچانک دورہ ختم کرنے پر پی سی بی کو معاوضہ ادا کردیا ہے۔

کرکٹ کے خبر رساں ادارے کے مطابق پاکستان کرکٹ بورڈ کی جانب سے معاوضہ کی رقم کا اعلان نہیں کیا گیا ہے تاہم پی سی بی اب نیوزی لینڈ کے اگلے سال دورہ پاکستان سے بھاری منافع کمائے گا۔

پی سی بی نے کیوی بورڈ سے یہ رقم مالی نقصان کا معاوضہ، سیکیورٹی، ہوٹل کی بکنگ اور مارکیٹنگ براڈ کاسٹ کی مد میں وصول کی ہے۔

دریں اثنا دونوں بورڈز کے درمیان تعلقات بھی معمول پر آگئے ہیں جبکہ پی سی بی نے آسٹریلیا میں ٹی ٹوئنٹی ورلڈ کپ سے قبل اکتوبر میں کرائسٹ چرچ میں سہہ فریقی سیریز میں شرکت کا دعوت نامہ قبول کرنے کا ذہن بنا لیا ہے۔

پی سی بی انگلینڈ کے خلاف ہوم سیریز کا شیڈول ایڈجسٹ کرنے میں مگن ہوگیا ہے جبکہ پاکستان کرکٹ بورڈ انگلینڈ کے خلاف سات ہوم ٹی ٹونٹی میچز کے شیڈول کو حتمی شکل دینے کے لئے بھی کوشاں ہے۔

ذرائع کے مطابق ہوم سیریز کا شیڈول سامنے آنے پر نیوزی لینڈ کے ایونٹ کا حتمی فیصلہ ہوگا تاہم پاکستان کرکٹ بورڈ نیوزی لینڈ میں ہونے والے سہہ ملکی ٹورنامنٹ میں قومی ٹیم بھیجنے کے لئے کوشاں ہے۔

پی سی بی کے ذرائع کا کہنا ہے کہ سہہ ملکی سیریز کے لیے نیوزی لینڈ کرکٹ بورڈ کے ساتھ رابطے میں ہیں، نیوزی لینڈ کرکٹ بورڈ نے تین ملکی سیریز کی پیشکش آئی سی سی میٹنگ کے دوران اپریل میں کی تھی۔

واضح رہے کہ نیوزی لینڈ نے 17 ستمبر 2021 کو راولپنڈی میں پہلے ون ڈے کے آغاز سے عین قبل سیکیورٹی خدشات کا بہانہ بناتے ہوئے واپسی وطن روانگی کا اعلان کیا تھا جس کے بعد دونوں بورڈز کے درمیان روابط کشیدہ ہوگئے تھے۔

تاہم اب نیوزی لینڈ کرکٹ ٹیم دسمبر 2022/جنوری 2023 میں تین ون ڈے اور دو ٹیسٹ میچز کھیلنے کے لیے پاکستان کا دورہ کرے گی۔