قومی ٹیم کے بلے باز عبداللہ شفیق دورہ سری لنکا میں اچھی پرفارمنس دکھانے کے لیے تیار ہیں۔

قومی ٹیم کے اوپنر عبداللہ شفیق نے پنڈی اسٹیڈیم  میں پریس کانفرنس کی جس میں ان کا کہنا تھا کہ کپتان بابر اعظم ورلڈ کلاس بلے باز ہیں اور ہم ان سے سیکھ رہے ہیں کیونکہ ان کے ساتھ کھیل کر سیکھنے کو ملتا ہے۔

عبداللہ شفیق کہتے ہیں سری لنکا کے خلاف ایک اچھی سیریز ہوگی، موسم سے بھی مطابقت ہوگی کیونکہ سری لنکا میں موسم اور وکٹ سے واقف ہیں لیکن سیریز ٹو سیریز دیکھیں گے۔

ان کا کہنا تھا کہ کپتان جو بہتر ہے اسی کو کھلاتے ہیں، پچھلی سیریز جو آسٹریلیا کے خلاف کھیلی اس سے کافی اعتماد ملا ہے جبکہ رکی پونٹنگ، بابر اعظم اور محمد یوسف ان کے آئیڈیل کھلاڑی ہیں۔

انہوں نے کہا کہ سری لنکا میں اسپن اٹیک ہوگا جس کی بھی تیاری کرلی ہے، دورہ سری لنکا پر اچھی کرکٹ کھیلنے کی کوشش کریں گے۔

عبدللہ شفیق کا کہنا تھا کہ پنڈی کرکٹ اسٹیڈیم میں دورہ سری لنکا کے حوالے سے کافی اچھی تیاری ہو رہی ہے، راولپنڈی میں جس طرح کا موسم ہے تو یہ کنڈیشنز سری لنکا میں بہت مددگار ثابت ہوں گی۔

انہوں نے مزید کہا کہ ہم سب اپنی تیاری رکھتے ہیں تاکہ موقع ملنے پر اچھا پرفارم کرسکیں۔

واضح رہے کہ سری لنکا کے خلاف ٹیسٹ سیریز کے لیے قومی اسکواڈ کی تیاریاں پنڈی کرکٹ اسٹیڈیم میں جاری ہیں جوکہ یکم جولائی تک جاری رہے گی۔

پریکٹس کے دوران قومی ٹیسٹ اسکواڈ میں شامل تمام 15 کھلاڑیوں کو کوچز کی جانب سے ہدف دیا گیا ہے۔

یاد رہے کہ پاکستان نے اپنا اگلا دورہ سری لنکا کا کرنا ہے جس دوران دونوں ٹیموں کے درمیان دو ٹیسٹ میچز پر مشتمل سیریز کھیلی جائے گی۔

سیریز کے لیے قومی ٹیم 6 جولائی کو سری لنکا پہنچے گی جس کے بعد سیریز سے قبل تین روزہ پریکٹس میچ کھیلا جائے گا۔

دونوں ٹیموں کے درمیان پہلا ٹیسٹ میچ 16 جولائی سے گال میں شروع ہوگا جبکہ دوسرا ٹیسٹ میچ 24 جولائی سے کولمبو میں کھیلا جائے گا۔