لاہور: پاکستان ہاکی ٹیم کے ہیڈ کوچ سیگفرائیڈ ایکمین کا کہنا ہے کہ اگر حقیقت پسندانہ بات کی جائے تو پاکستان ٹیم کے لیے کامن ویلتھ گیمز میں بہت مشکل ہوگی۔

پاکستان ہاکی ٹیم کے ہیڈ کوچ سیگفرائیڈ ایکمین کا کہنا ہے کہ کامن ویلتھ گیمز میں اس وقت ہم سب سے کم رینکنگ کی ٹیم ہیں، ہم میدان میں ہرممکن فائٹ کریں گے لیکن میں حیران کن چیزیں نہیں کرسکتا۔

انہوں نے کہا کہ اگر حقیقت پسندانہ بات کی جائے تو پاکستان ٹیم کے لیے کامن ویلتھ گیمز میں بہت مشکل ہوگی لیکن مجھے امید ہے کہ کھلاڑی اپنی صلاحیتوں کے مطابق کھیلیں گے۔

ہیڈ کوچ ہاکی ٹیم نے کہا کہ کامن ویلتھ گیمز میں ہر ٹیم ہمیں ٹف ٹائم دے گی اور اسی چیلنج کا ہمیں سامنا ہے، ہم حریف ٹیموں کو چیلنج کریں گے یہی ہماری ذمہ داری ہے۔

سیگفرائیڈ ایکمین کہتے ہیں ہم کامن ویلتھ گیمز میں سب کو حیران کرنے کی کوشش کریں گے، اسپورٹس سائنسز کے مطابق کامن ویلتھ گیمز کی تیاری کے لیے وقت کم ہے۔

ان کا کہنا تھا کہ کھلاڑی ناممکن کو ممکن بنا سکتے ہیں، کیمپ میں تاخیر سے پہنچا ہوں لیکن  کوشش ہوگی کہ عید کی چھٹیوں کے بعد جو وقت ملے اس سے فائدہ اٹھائیں۔

ہیڈ کوچ نے کہا کہ برمنگھم میں موسم مختلف ہوگا جو کہ ہمارے لئے آئیڈیل نہیں ہے جس طرح غیر ملکی ٹیمیں جب یہاں آتی ہیں تو انہیں بھی مختلف کنڈیشنز کا سامنا ہوتا ہے۔ کنڈیشنز کا مختلف ہونا کھیل کا حصہ ہے اور ہمیں ان کے مطابق خود کو ڈھالنا ہے۔

انہوں نے مزید کہا کہ ہمیں بس میدان میں اچھا کھیلنا ہے اور اپنا بہترین دینا ہے، موسم کی معذرت پیش نہیں کی جاسکتی بس ہمیں میدان میں حریف ٹیم کے خلاف اچھا کھیل پیش کرنا ہے۔