بھارت نے انگلینڈ کو ون ڈے سیریز کے پہلے میچ میں باآسانی شکست دے کر سیریز میں 0-1 کی برتری حاصل کر لی ہے۔

تفصیلات کے مطابق اوول کے میدان میں مہمان ٹیم بھارت نے ٹاس جیت کر پہلے فیلڈنگ کرنے کا فیصلہ کیا جو کہ بالکل درست ثابت ہوا ۔انگلینڈ کی ٹاپ بیٹنگ لائن اپ میں سے 4 کھلاڑی صفر پر ہی آؤٹ ہوگئے۔

دوسرے ہی اوور میں جیسن روئے اور جو روٹ جبکہ تیسرے اوور میں بین اسٹوکس بغیر کھاتہ کھولے ہی پویلین لوٹ گئے۔

آٹھویں اوور میں 26 کے مجموعی اسکور پر انگلینڈ کی آدھی ٹیم پویلین لوٹ چکی تھی۔جونی بیئر اسٹو 7 اور لیام لیونگ اسٹون  صفر پر آؤٹ ہوئے۔

بعد ازاں کپتان جوز بٹلر نے معین علی کے ساتھ مل کر 27 رنز کی شراکت قائم کرکے ٹیم کو کچھ سنبھالا تاہم معین علی 14 رنز بناکر چلتے بنے۔

جوز بٹلر بھی 59 کے مجموعی اسکور پر 30 رنز بناکر آؤٹ ہوگئے۔68 کے مجموعی اسکور پر کریگ اوورٹن 8  رنز بناکر آؤٹ ہوئے۔اس کے بعد برائڈن کارس اور ڈیوڈ ویلی نے شراکت قائم کرکے اسکور 103 تک پہنچا دیا۔

برائڈن کارس 15 رنز بناکر آؤٹ ہوگئے جبکہ 110 کے مجموعی اسکور پر انگلینڈ کی آخری امید ڈیوڈ ویلی  بھی 21 رنز بناکر آؤٹ ہوگئے۔  ریس ٹوپلی  6 رنز بناکر ناٹ آؤٹ رہے۔

بھارتی اوپنرز روہت شرما اور شیکھر دھون نے مطلوبہ ہدف باآسانی 18.4 اوورز میں حاصل کر لیا۔شیکھر دھون نے 31 رنز بنائے جبکہ روہت شرما نے 76 رنز بنائے جبکہ جسپریت بمرا کو 6 وکٹیں حاصل کرنے پر مین آف دی میچ کا ایوارڈ دیا گیا۔