پاکستان کے آل راؤنڈر عماد وسیم ان دنوں ٹیم سے باہر ہیں جبکہ حال ہی میں سینٹرل کنٹریکٹ کھلاڑیوں کے اعلان کے بعد سے وہ مشکل مرحلے سے گزر رہے ہیں۔

پاکستان کے 33 سالہ آل راؤنڈر عماد وسیم ٹی ٹوئنٹی ورلڈکپ 2021 کے بعد سے پاکستان ٹیم کی نمائندگی نہیں کرسکے ہیں۔

نجی خبر رساں ادارے کو عید الاضحیٰ کے خصوصی پروگرام میں انٹرویو دیتے ہوئے عماد وسیم نے اپنی موجودہ صورت حال، فٹنس، بابر اعظم کے ساتھ تعلقات اور بھی کئی موضوع پر بات کی ہے۔

قومی آل راؤنڈر کہتے ہیں میں نے ورلڈ کپ کے بعد سے ایک بھی میچ نہیں کھیلا، مجھے اس کے پیچھے کی وجہ نہیں معلوم لیکن سچ پوچھیں تو مجھے کوئی جواز فراہم نہیں کیا گیا اور نہ ہی مجھے اس کی وجوہات بتائی گئی ہیں۔

انہوں نے کہا کہ میں انتظامیہ سے مطمئن نہیں ہوں لیکن جو بھی ہوتا ہے اللہ کی مرضی سے ہوتا ہے، جب بھی اسکواڈ کا اعلان ہوتا ہے تو مجھے وجوہات جاننے کے لیے خود سے رابطہ کرنا پڑتا ہے جس کا کبھی وہ جواب دیتے ہیں اور کبھی نہیں دیتے۔

وضاحتوں کے بارے میں بات کرتے ہوئے عماد وسیم نے کہا کہ میں ان کی وضاحتوں سے غیر مطمئن ہوں کیونکہ ایک وجہ جو مجھے بتائی گئی ہے وہ میرا ٹیم پر مثبت اثر و رسوخ ہے جبکہ میں نہیں سمجھتا کہ میرا کوئی منفی اثر ہے۔

ان کا کہنا تھا کہ میں پوری دنیا میں لیگز کھیلتا ہوں اور جس ٹیم کے ساتھ میں ایک مرتبہ کھیلوں وہ مجھے دوبارہ بلاتے ہیں جس سے ثابت ہوتا ہے کہ میں منفی اثر نہیں ڈالتا۔

انہیں کئی فٹنس مسائل کا بھی سامنا رہا ہے جس پر بات کرتے ہوئے انہوں نے کہا کہ آج تک انتظامیہ انہیں ٹیم سے باہر رکھنے کے لیے اس بہانے کو بھی استعمال کرتی ہے۔

انہوں نے مزید کہا کہ مجھے ہمیشہ پاکستان کی نمائندگی کرکے عزت اور فخر محسوس ہوتا ہے، پہلے انتخاب نہ ہونے پر میں مایوس ہوا کرتا تھا لیکن اب بہت عجیب محسوس کرتا ہوں کیونکہ ان کے جواب ہمیشہ ایک جیسے ہوتے ہیں۔

چیئرمین پی سی بی رمیز راجہ کے حوالے سے بات کرتے ہوئے ان کا کہنا تھا رمیز بھائی چیزوں کے بارے میں جانتے ہیں کیونکہ وہ خود بھی کرکٹ کھیل چکے ہیں، میں مزید کچھ نہیں کہہ سکتا۔

مستقبل کے بارے میں گفتگو کرتے ہوئے عماد وسیم نے کہا کہ میں اب بھی 4 سے 5 سال مزید کرکٹ کھیل سکتا ہوں جبکہ میں ایک بار پھر پاکستان کی نمائندگی کرنے کے لیے پرامید ہوں۔