لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) سیزن 7 کے منافع کا حصہ فرنچائزز کو بھیج دیا ہے۔

پی سی بی کے چیئرمین رمیز راجہ نے پی ایس ایل 7 کے اختتام پر 900 ملین روپے کے منافع کا اعلان کیا تھا لیکن گزشتہ ماہ ایک میڈیا پریس بریفنگ کے دوران انہوں نے اعلان کیا تھا کہ پی ایس ایل کی ہر فرنچائز نے 810 ملین روپے کا منافع کمایا ہے۔

تاہم تمام اخراجات کو کم کرنے کے بعد منافع اعلان کردہ رقم کے نصف سے بھی کم ہے، کچھ مالکان بعض کٹوتیوں پر ناخوش دکھائی دے رہے ہیں جبکہ اخراجات میں ہونے والی خرابی بھی ان کے ساتھ شیئر نہیں کی گئی ہے۔

ٹی وی پروڈکشن پر فرنچائزز کو 95 فیصد دنیا پڑتا ہے جبکہ ہوٹل میں رہائش، سفری اخراجات، ڈیلی الاؤنسز، ایونٹ مینجمنٹ اور کھلاڑیوں کی فیس سمیت کوچز کی فیس بھی ٹیم ہی ادا کرتی ہے جو کہ کٹوتی کے بعد 420 ملین پاکستانی روپے ہی بچتے ہیں۔

واضح رہے کہ معاہدے کے مطابق پی سی بی کو پی ایس ایل 7 کی آمدن کا نصف فرنچائزز کو 5 مئی تک دینا تھا لیکن 2 ماہ گزرنے کے بعد بھی ایسا نہیں ہوا تھا۔

جس کے بعد سی ایف او نے ٹیم مالکان کو یقین دلایا تھا کہ 90 فیصد ادائیگی جولائی میں کردی جائے گی جبکہ بقیہ 10 فیصد ستمبر تک معاہدے کے تحت رکھی گئی تھی۔

بورڈ نے فرنچائزز پر اسٹیک ہولڈرز کے خلاف عدالتی کیس کے اخراجات بھی منتقل کر دیئے ہیں جس پر مالکان ناخوش ہیں جبکہ سابق چیئرمین احسان مانی کہہ چکے تھے کہ یہ رقم پی سی بی ادا کرے گا۔