پاکستان کے سابق کپتان وکٹ کیپر بیٹسمین راشد لطیف دورہ سری لنکا میں قومی ٹیم کی سلیکشن پر ناخوش ہیں۔

تفصیلات کے مطابق راشد لطیف نے ایک کرکٹ ویب سائٹ کو انٹرویو دیتے ہوئے کہا کہ سری لنکا ٹور کے دونوں ٹیسٹ میچز میں ٹیم سلیکشن درست نہیں تھی۔

انہوں نے کہا کہ پہلے ٹیسٹ میں بابر اعظم اور عبداللہ شفیق کی غیر معمولی کارکردگی کی وجہ سے قومی ٹیم نے فتح حاصل کی بصورت دیگر مجموعی طور پر کھلاڑیوں کی کارکردگی اچھی نہیں تھی۔

سابق وکٹ کیپر نے کہا کہ قومی ٹیم کے پاس کھلاڑی موجود تھے لیکن پلئینگ الیون کے لیے درست انتخاب نہ کر سکے۔

انہوں نے مزید کہا کہ اگر اظہر علی رنز نہیں کر رہے تھے تو شان مسعود یا سرفراز کو  کو کھلانا تھا، آپشنز کے باوجود ان کا استعمال نہیں کیا گیا۔

حسن علی کے حوالے سے راشد لطیف نے کہا کہ سری لنکا کی کنڈیشنز میں اس کی جگہ نہیں بنتی اس کی جگہ فہیم اشرف بہترین انتخاب تھا جو بولنگ کے ساتھ رنز بھی بنا سکتا ہے۔

راشد کا کہنا تھا کہ سری لنکا کی کنڈیشنز قومی ٹیم کے لیے سازگار تھی لیکن اعتماد کی کمی کی وجہ سے کھلاڑی توقعات پر پورا نہ اتر سکے۔

راشد لطیف نے اس بات کا اعتراف کیا کہ محدود وسائل کے باوجود سری لنکا میں اچھی کرکٹ ہوئی اور ٹیسٹ کرکٹ عروج پر نظر آئی۔ ہم نے پہلے ٹیسٹ کی غلطیوں سے سبق نہیں سیکھا اسی لیے دوسرے میچ میں شکست ہوئی۔