قومی ٹیم کے کپتان بابراعظم نے کہا ہے کہ سری لنکا میں اچھی کارکردگی دکھانے کیلئے پر عزم ہیں۔

کپتان بابر اعظم نے لاہور میں پریس کانفرنس کرتے ہوئے کہا کہ 2015 کے بعد اب سری لنکا کھیلنے جارہے ہیں، ٹریننگ کیمپ میں  اپنی بھرپور تیاری کی ہے، پوری ٹیم کارکردگی دکھانے کیلئے پر عزم ہیں۔

قومی ٹیم کے کپتان کا کہنا تھا کہ یاسر شاہ واپس آئے ہیں، سری لنکا میں کنڈیشنز اسپنرزکیلئے کافی مددگار ثابت ہونگی ۔

کپتان بابر اعظم کا کہنا تھا کہ ٹیسٹ میچ میں ایڈجسٹ ہونے میں وقت لگتا ہے، ہم ٹیسٹ کرکٹ میں بھی ٹریک پر آرہے ہیں۔

بابر اعظم کا کہنا تھا کہ آسٹریلیا کے خلاف ہم نے اچھا کھیلا تھا اب بھی تمام کھلاڑیوں نے نیشنل ہائی پرفارمنس سینٹر میں اپنی بھرپور تیاری کی ہے، راولپنڈی میں بھی کیمپ لگایا گیا تھا جس میں ہم نے خود کو تیار کیا۔

کپتان نے کہا کہ سری لنکا کے خلاف ٹیسٹ سیریز سے قبل ہمارے پاس کافی وقت تھا، اس سیریز کے پوائنٹس اہم ہیں، یہ پوائنٹس آئی سی سی ٹیسٹ چیمپئن شپ کیلئے کافی اہمیت رکھتے ہیں۔

انہوں نے کہا کہ ہم سری لنکا کی کنڈیشنز کے لئے تیار ہیں، فاسٹ بولرز پر بھی اعتماد ہے، وہ بھی ہر کنڈیشن میں اچھا پرفارم کر سکتے ہیں۔

قومی ٹیم کے کہتان کا کہنا تھا کہ میچ سے قبل کنڈیشنز دیکھ کر ٹیم فائنل کریں گے، اور اسی دوران شان مسعود کے حوالے سے کوئی فیصلہ کریں گے۔

ساجد خان کے حوالے سے بابر اعظم نے بتایا کہ وہ اپنے ایکشن پر کام کررہے ہیں، ساجد خان اپنے ایکشن میں تبدیلی لارہے ہیں۔

بابر اعظم کا کہنا تھا کہ یاسر شاہ کا بھی کم بیک ہوا جس پر خوشی ہوں، یاسر شاہ کو فٹنس کے مسائل تھے لیکن وہ کافی محنت کرکے واپس آئے ہیں، ان میں کافی تبدیلی نظر آئی امید ہے کہ وہ اچھا پرفارم کریں۔

قومی ٹیم کے کپتان بابر اعظم کا مزید کہنا تھا کہ میں ٹیسٹ فارمیٹ میں ڈبل محنت کررہا ہوں تاکہ ٹیسٹ رینکنگ میں نمبر ون پرآؤں۔