آئی سی سی نے برمنگھم میں جاری آئی سی سی کی سالانہ کانفرنس کے دوران تین نئے ممالک کو رکنیت کا درجہ دے دیا۔

تفصیلات کے مطابق آئی سی سی کی سالانہ کانفرنس میں ایشیا سے کمبوڈیا اور ازبکستان، اور افریقہ سے کوٹ ڈی آئیور، سبھی کو ایسوسی ایٹ رکنیت کا درجہ دیا گیا۔

ان تینوں ممالک کی آمد کے بعد آئی سی سی کے کل ممبران کی تعداد 108 ہو گئی ہے جن میں 96 ایسوسی ایٹ ممبرز ہیں۔

کمبوڈیا اور ازبکستان کی آمد کے بعد ایشیا سے آئی سی سی ممبران کی کل تعداد 25 ہو گئی ہے جبکہ ڈی آئیور افریقہ کا 21 واں ملک ہے۔

کرکٹ فیڈریشن آف ازبکستان کے خواتین کے کرکٹ پلان کے تحت 15 ٹیمیں اپنے انڈر 19 اور انڈر 17 کھلاڑیوں کے لیے ایک پاتھ وے پروگرام کے ساتھ منظم مقابلے کھیل رہی ہیں۔

کوٹ ڈی آئیور کرکٹ فیڈریشن کا نچلی سطح پر ایک مضبوط پروگرام ہے اور وہ آٹھ ٹیموں کے ساتھ قومی لیگ کے سینئر مردوں کے مقابلے بھی چلاتی ہے۔

قابل ذکر بات یہ ہے کہ کوٹ ڈی آئیور کرکٹ فیڈریشن نے خواتین کی کرکٹ کو بڑھانے کے لیے ایک خاتون بورڈ ممبر کی تقرری بھی کی ہے۔

کرکٹ ایسوسی ایشن آف کمبوڈیا جو عالمی وباء کورونا سے شدید متاثر ہوئی تھی، کو بورڈ کے تابع رکنیت سے نوازا گیا جو یہ ظاہر کرتا ہے کہ اس کے پاس سال کے آخر تک خواتین کے لیے اطمینان بخش راستہ موجود ہے۔

 کمبوڈیا نومبر 2022 میں آٹھ ٹیموں کے ساتھ ایک ٹی ٹوئنٹی ٹورنامنٹ منعقد کرانے جا رہا ہے، جبکہ آٹھ اسکولوں میں انڈور کرکٹ سرگرمیاں دوبارہ شروع ہونے کی امید ہے۔

کمبوڈیا کے پاس 14 رجسٹرڈ ٹیمیں بھی ہیں جو ملک میں باقاعدگی سے مردوں کی سینئر ڈومیسٹک کرکٹ کھیلتی ہیں اور اس کا مقامی کوچز کے ساتھ جونیئر کرکٹ کا ایک امید افزا پروگرام ہے۔

آئی سی سی کی رکنیت کے لیے یوکرین کی درخواست اس وقت تک موخر کر دی گئی ہے جب تک کہ ملک میں کرکٹ کی سرگرمیاں بحفاظت دوبارہ شروع نہیں ہو جاتی۔

لیکن آئی سی سی اس عمل کے ذریعے یوکرین کرکٹ فیڈریشن کی حمایت جاری رکھے گی۔