جنوبی افریقہ نے جنوری میں آسٹریلیا کے ساتھ تین بین الاقوامی ایک روزہ میچز سے دستبرداری کا اعلان کر دیا ہے۔ 

تفصیلات کے مطابق جنوبی افریقہ  نے میزبان ملک کرکٹ آسٹریلیا سے سیریز کے دوبارہ ری شیڈول کرنے کی درخواست دی تھی جو کرکٹ آسٹریلیا نے مسترد کر دی ہے۔

مقامی میڈیا کی رپورٹ کے مطابق کرکٹ آسٹریلیا نے کہا کہ کرکٹ جنوبی افریقہ نے سیریز کو منتقل کرنے کو کہا تھا، جو ہوبارٹ (12 جنوری)، سڈنی (14 جنوری) اور پرتھ (17 جنوری) کو شیڈول تھی۔

کرکٹ آسٹریلیا نے آج اپنے ایک بیان میں کہا بدقسمتی سے، آئی سی سی مینز ٹی 20 ورلڈ کپ سمیت مصروف بین الاقوامی شیڈول کی وجہ سے کوئی متبادل تاریخیں دستیاب نہیں ہیں۔

کرکٹ آسٹریلیا کے ترجمان کا کہنا ہے کہ جنوبی افریقہ نے اس بات پر اتفاق کیا ہے کہ آسٹریلیا کو مقابلے کے پوائنٹس دیئے جائیں گے، جس کی بین الاقوامی کرکٹ کونسل سے منظوری باقی ہے۔

جنوبی افریقہ کی شکست ان کے اگلے سال بھارت میں ہونے والے ایک روزہ ورلڈ کپ کے لیے براہ راست کوالیفائی کرنے کے امکانات کو متاثر کر سکتی ہے۔

پروٹیز ورلڈ کپ سپر لیگ سٹینڈنگ میں 11 ویں نمبر پر ہیں، میزبان بھارت کے علاوہ صرف ٹاپ سات ٹیمیں 10 ٹیموں کے ٹورنامنٹ کے لیے براہ راست کوالیفائی کر سکیں گی۔

واضح رہے کہ جنوبی افریقہ کی ٹیسٹ ٹیم 17 دسمبر سے برسبین میں شروع ہونے والی تین میچوں کی سیریز کے لیے آسٹریلیا کا دورہ کرنے والی ہے۔

آسٹریلیا نے کورونا سے متاثرہ سال کے درمیان صحت کے خطرات کا حوالہ دیتے ہوئے پچھلے سال جنوبی افریقہ میں اپنے شیڈولڈ ٹیسٹ ٹور سے دستبرداری اختیار کی تھی۔

آسٹریلیا کی ٹیسٹ سیریز سے دستبرداری کے اس فیصلے پر کرکٹ جنوبی افریقہ نے شدید مایوسی کا اظہار کیا تھا۔