پاکستان جونیئر لیگ کے معاملے پر پی ایس ایل کی فرنچائزز کنفیوژن کا شکار دکھائی دے رہی ہیں۔

پاکستان جونیئر لیگ (پی جے ایل) کے معاملے پر پاکستان سپر لیگ (پی ایس ایل) کی فرنچائزز ایک صفحے پر نظر نہیں آرہی ہیں۔ کئی فرنچائزز نے لیگ میں دلچسپی ظاہر کی ہے جبکہ کچھ فرنچائزز تحفظات کا شکار ہیں۔

تفصیلات کے مطابق پاکستان جونیئر لیگ چیئرمین پی سی بی رمیز راجہ کا ڈریم پراجیکٹ ہے جس کا پہلا ایڈیشن اکتوبر میں منعقد کرنے کا اعلان کیا جا چکا ہے۔

پی سی بی نے کچھ عرصہ قبل اس ایونٹ کے لیے اظہار دلچسپی کا اشتہار بھی جاری کیا تھا جس میں پی ایس ایل کی متعدد فرنچائزز نے شرکت کی تھی۔

ذرائع کے مطابق پی جے ایل کی فرنچائزز خریدنے میں تین ٹیمیں بھی دلچسپی رکھتی تھیں تاہم اب ان میں سے ایک نے اپنا ارادہ بدل لیا ہے۔ کچھ مالکان نے جونیئر لیگ پر بھی خدشات کا اظہار کیا کہ اس سے پی ایس ایل کے برانڈ کو نقصان پہنچ سکتا ہے۔

ملاقات کے دوران انہوں نے رائے دی ہے کہ ملک میں صرف ایک لیگ ہونی چاہیے۔ انہوں نے اس بات پر بھی بات کی کہ ایک طرف لیگ کی مخالفت ہے جبکہ کچھ ٹیمیں خریدنے کا ارادہ رکھتے ہیں۔

مالکان جونیئر لیگ کے حوالے سے اپنے تحفظات سے آگاہ کرنے کے لیے پی سی بی کو مشترکہ خط لکھنا چاہتے ہیں لیکن اس سے پہلے ان سب کا ایک پیج پر ہونا ضروری ہے۔

اجلاس میں اس بات پر بھی غور کیا گیا کہ یا تو پی ایس ایل کی تمام فرنچائزز ٹیموں کو پی جے ایل میں لے جائیں یا کسی کو نہ لیں۔ اس حوالے سے جلد فیصلہ کیا جائے گا۔

دوسری جانب گزشتہ دس ماہ سے پی ایس ایل گورننگ کونسل کا اجلاس نہ ہونے کی وجہ سے ٹیم مالکان سخت پریشان ہیں۔ گزشتہ دنوں پیش رفت ہوئی تھی لیکن اب مکمل خاموشی ہے۔

واضح رہے کہ چیئرمین رمیز راجہ بھی ان دنوں آئی سی سی اجلاسوں کی وجہ سے انگلینڈ میں موجود ہیں۔