گال: سری لنکا نے دوسری اننگز میں 8 وکٹوں کے نقصان پر 360 رنز پر اپنی دوسری اننگز ڈکلیئر کردی ہے جس کے بعد پاکستان کو جیت کے لیے 508 رنز کا ہدف دیا ہے۔

پاکستان اور سری لنکا کی کرکٹ ٹیموں کے درمیان گال میں دوسرا ٹیسٹ میچ جاری ہے جس کے چوتھے دن کا کھیل آج کھیلا گیا۔

چوتھے دن کے کھیل کا آغاز سری لنکا نے 5 وکٹوں کے نقصان پر 176 رنز پر کیا جبکہ سری لنکا نے 8 وکٹوں کے نقصان پر 360 رنز پر اپنی دوسری اننگز ڈکلیئر کردی۔

اسی کے ساتھ ہی سری لنکا نے پاکستان کو جیت کے لیے 508 رنز کا پہاڑ جیسا ہدف دیا جس کے جواب میں پاکستان کی بیٹنگ جاری ہے تاہم ایک دن کا کھیل اب بھی باقی ہے۔

یہ بھی پڑھیں: گال ٹیسٹ؛ پہلی اننگز میں قومی ٹیم 231 پر آؤٹ، سری لنکا کی برتری 323رنز ہوگئی

پاکستان کو جیت کے لیے 419 رنز درکار ہیں جبکہ سری لنکا کی میچ پر گرفت مضبوط نظر آرہی ہے اور انہیں پورے دن کے کھیل میں 9 وکٹیں درکار ہیں۔

پاکستان کی دوسری اننگز

پاکستان کی جانب سے بیٹنگ کا آغاز اوپنر عبداللہ شفیق اور امام الحق نے کیا لیکن عبداللہ شفیق زیادہ دیر وکٹ پر نہ ٹک سکے اور 16 رنز بناکر بربھات جے سوریا کی گیند پر کیچ دے بیٹھے۔

تاہم کپتان بابر اعظم نے آکر وکٹ کو سنبھالا اور اوپنر امام الحق کا بھرپور ساتھ دیا جبکہ امام الحق 46 اور بابر اعظم 26 رنز بناکر کریز پر موجود ہیں۔

سری لنکا کی دوسری اننگز

سری لنکا نے دوسری اننگز میں 8 وکٹوں کے نقصان پر 360 رنز بناکر اپنی اننگز ڈکلیئر کردی جبکہ دھنن جیا ڈی سلوا سنچری کی بدولت 109 رنز بناکر ٹاپ اسکورر رہے۔

سری لنکا کے کپتان دمتھ کرونا رتنے نے 61 رنز کی شاندار اننگز کھیلی جبکہ اینجلو میتھیوز 35، دنیش چندیمل 21، اوشادہ فرننڈو 19 اور دنتھ ویلا لیج نے 18 رنز بنائے۔ رمیش مینڈس 45 رنز بناکر ناٹ آؤٹ رہے۔

یہ بھی پڑھیں: گال ٹیسٹ کی فتح نے بہت اعتماد دیا، ڈریسنگ روم میں حوصلے بلند ہیں، بابر اعظم

پاکستان کی جانب سے محمد نواز اور نسیم شاہ نے 2،2 کھلاڑیوں کو آؤٹ کیا جبکہ یاسر شاہ، نعمان علی اور آغا سلمان ایک ایک وکٹ لینے میں کامیاب رہے ہیں۔

پاکستان کی پہلی اننگز

ہدف کے تعاقب میں پاکستان ٹیم شروع سے ہی مشکلات کا شکار رہی اور پہلی وکٹ صفر پر ہی گرگئی، اوپنر عبداللہ شفیق بغیر کوئی رن بنائے پویلین لوٹ گئے ، امام الحق نے 32 رنز بنائے جبکہ محمد رضوان اور فواد عالم 24،24 بنانے میں کامیاب رہے ، کپتان بابر اعظم بھی 16 رنز بناکر پویلین لوٹ گئے۔

پاکستان کی جانب سے سب سے زیادہ رنز آغا سلمان نے اسکور کیے، انہوں نے 62 رنز کی اننگز کھیلی جب کہ محمد نواز 12 اور حسن علی 21 رنز بناکر پویلین لوٹ گئے۔

سری لنکا کی جانب سے رمیش مینڈس نے 5  جب کہ پربھات جے سوریا نے 3 اور اسیتھا فرننڈو، ڈی سلوا نے ایک ایک وکٹ حاصل کی۔

سری لنکا کی پہلی اننگز

سری لنکا کی جانب سے سب سے بڑی اننگز دنیش چندیمل نے 80 رنز کی کھیلی جن کی اننگز کا اختتام محمد نواز کی گیند پر فواد احمد کے ہاتھوں کیچ دے کر ہوا۔

نیروشن ڈک ویلا 51، اوشادہ فرننڈو 50، دمتھ کرونارتنے 40 اور اینجلو میتھیوز 42 رنز بناکر آؤٹ ہوئے جبکہ رمیش مینڈش 35 اور ڈی سلوا 33 رنز بنانے میں کامیاب رہے۔

یہ بھی پڑھیں: سری لنکا کو دوسرے ٹیسٹ سے قبل بڑا دھچکا

پاکستان کی جانب سے نسیم شاہ اور یاسر شاہ نے 3،3 کھلاڑیوں کو آؤٹ کیا جبکہ محمد نواز 2 اور نعمان علی ایک وکٹ لینے میں کامیاب رہے۔

واضح رہے کہ گال میں ہونے والے پہلے ٹیسٹ میچ میں پاکستان نے 4 وکٹوں سے کامیابی اپنے نام کی تھی جبکہ پاکستان کو سیریز میں 1-0 کی برتری حاصل ہے۔