لاہور: پاکستان کرکٹ ٹیم دورہ سری لنکا کے لیے نجی ایئرلائن کے ذریعے روانہ ہوگئی ہے۔

تفصیلات کے مطابق قومی ٹیم نجی ایئر لائن کی پرواز پر براستہ دبئی کولمبو روانہ ہوگئی ہے جبکہ قومی ٹیم 2015 کے بعد پہلی مرتبہ سری لنکا روانہ ہورہی ہے۔

https://twitter.com/TheRealPCB/status/1544441228430811136?ref_src=twsrc%5Etfw%7Ctwcamp%5Etweetembed%7Ctwterm%5E1544441228430811136%7Ctwgr%5E%7Ctwcon%5Es1_&ref_url=https%3A%2F%2Furdu.geo.tv%2Flatest%2F290847-

قومی ٹیسٹ اسکواڈ لاہور کے نیشنل پرفارمنس سینٹر سے رات گئے ایئرپورٹ پہنچا، جہاں سے وہ غیر ملکی پرواز کے ذریعے سری لنکا روانہ ہوا۔

پاکستان ٹیم آج شام 6 بجے پاکستانی وقت کے مطابق کولمبو پہنچے گی۔

واضح رہے کہ پاکستان اور سری لنکا کے درمیان دو ٹیسٹ میچز شیڈول ہیں، پہلا ٹیسٹ 16 جولائی سے 20 جولائی تک گالے میں کھیلا جائے گا۔

دوسرا ٹیسٹ میچ 24 جولائی سے 28 جولائی تک کولمبو میں شیڈول ہے جبکہ سیریز سے قبل قومی ٹیم پریکٹس میچ میں جم کر اپنے ہتھیار تیز کرے گی۔

دوسری جانب قومی ٹیم کے کپتان بابر اعظم ٹیسٹ سیریز جیتنے کے لیے پرعزم دکھائی دے رہے ہیں۔

ان کا کہنا تھا کہ 2015 کے بعد اب سری لنکا کھیلنے جارہے ہیں، ٹریننگ کیمپ میں اپنی بھرپور تیاری کی ہے، پوری ٹیم کارکردگی دکھانے کیلئے پر عزم ہیں۔

قومی ٹیم کے کپتان کا کہنا تھا کہ یاسر شاہ واپس آئے ہیں، سری لنکا میں کنڈیشنز اسپنرزکیلئے کافی مددگار ثابت ہوں گی۔

کپتان بابر اعظم کا کہنا تھا کہ ٹیسٹ میچ میں ایڈجسٹ ہونے میں وقت لگتا ہے، ہم ٹیسٹ کرکٹ میں بھی ٹریک پر آرہے ہیں۔

بابر اعظم کا کہنا تھا کہ آسٹریلیا کے خلاف ہم نے اچھا کھیلا تھا اب بھی تمام کھلاڑیوں نے نیشنل ہائی پرفارمنس سینٹر میں اپنی بھرپور تیاری کی ہے، راولپنڈی میں بھی کیمپ لگایا گیا تھا جس میں ہم نے خود کو تیار کیا۔

کپتان نے کہا کہ سری لنکا کے خلاف ٹیسٹ سیریز سے قبل ہمارے پاس کافی وقت تھا، اس سیریز کے پوائنٹس اہم ہیں، یہ پوائنٹس آئی سی سی ٹیسٹ چیمپئن شپ کیلئے کافی اہمیت رکھتے ہیں۔

انہوں نے مزید کہا کہ ہم سری لنکا کی کنڈیشنز کے لئے تیار ہیں، فاسٹ بولرز پر بھی اعتماد ہے، وہ بھی ہر کنڈیشن میں اچھا پرفارم کر سکتے ہیں۔