سابق کپتان انگلینڈ کرکٹ ٹیم ناصر حسین پاکستان کے بائیں ہاتھ کے فاسٹ بولر شاہین شاہ اور محمد عامر کے معترف ہوگئے ہیں۔

سابق کپتان انگلینڈ کرکٹ ٹیم ناصر حسین کا کہنا ہے کہ بائیں ہاتھ کے باؤلرز بھارت کے لیے مشکلات کا سبب بنتے ہیں، شاہین آفریدی نے بھارت کے پرخچے اڑا دیے تھے۔

ناصر حسین کہتے ہیں بھارت کی کرکٹ ٹیم بائیں ہاتھ کے فاسٹ بولروں کے سامنے مشکل میں نظر آتی ہے جبکہ تاریخ بتاتی ہے کہ شاہین آفریدی نے بھارتی بیٹنگ لائن اپ کو اڑا کر رکھ دیا تھا۔

سابق انگلش کپتان کا کہنا تھا کہ بھارت ایک مضبوط ٹیم ہے، انگلینڈ میں بھی ون ڈے سیریز جیتی۔

ناصر حسین کا کہنا تھا کہ بھارت کو ٹی ٹونٹی ورلڈ کپ 2021 کے دبئی میں ہونے والے میچ سے سیکھنا ہوگا، بھارت کی ٹاپ آرڈر کو ڈرپوک بننے کی ضرورت نہیں جبکہ دبئی میں بھارتی بیٹرز ڈرپوک ہوگئے تھے۔

انہوں نے کہا کہ جب آپ کے پاس مڈل آرڈر میں ریشبھ پنٹ اور ہاردک پانڈیا ہوں تو ڈرپوک بننے کی ضرورت نہیں ہے۔

ان کا کہنا ہے کہ چیمپئنز ٹرافی 2017 کے فائنل میں بھی پاکستان کے ایک اور بائیں ہاتھ کے فاسٹ بولر محمد عامر نے بھارتی بیٹرز کو اڑا کر رکھ دیا تھا۔

انہوں نے مزید کہا کہ سیریز کے آخری ون ڈے میچ میں انگلینڈ کے ریس ٹاپلے نے انڈین بیٹرز کو پریشان کیا،روہت شرما اینڈ کمپنی کو بائیں ہاتھ کے فاسٹ بولرز کو کچھ بہتر انداز سے کھیلنا سیکھنا ہوگا۔