جنوبی امریکہ کے ممالک یوراگوئے، چلی، ارجنٹائن اور پیرا گوئے نے فیفا ورلڈ کپ 2030 کی مشترکہ میزبانی حاصل کرنے کا تہیہ کر لیا ہے۔

تفصیلات کے مطابق چار جنوبی امریکی ممالک آج 2030 ورلڈ کپ کی میزبانی کے لیے ایک بے مثال مشترکہ بولی کا آغاز کریں گے اس امید کے ساتھ کہ عالمی شو پیس کو اس کے پہلے گھر میں واپس لایا جائے گا۔

واضح رہے کہ یوراگوئے، ارجنٹائن، پیراگوئے اور چلی کی بولی لگانے کا ارادہ طویل عرصے سے جاری ہے۔ گزشتہ تین سال یہ چاروں ممالک اپنی بولی کی منصوبہ بندی کر رہے ہیں، اس مقصد کے لیے انہوں جنوبی امریکی فٹ بال کی گورننگ باڈی کو بھی اعتماد میں لیا ہے۔

جنوبی امریکہ فٹ بال کی گورننگ باڈی کے صدر ایلی جاندرو نے کہا کہ فیفا ورلڈ کپ کو اس کے اصل گھر میں لانے کے لیے ہماری اولین ترجیح ہے۔

یاد رہے کہ 1930 میں ورلڈ کپ کا پہلا ایڈیشن یوراگوئے میں منعقد ہوا تھا اور میزبان یورا گوئے نے فائنل میں اپنے پڑوسی ارجنٹائن کو 4-2 سے شکست دی تھی۔

یوراگوئے کے تاریخی فٹ بال اسٹیڈیم کو اس مشترکہ میزبانی کے فائنل لیے منتخب کر لیا گیا ہے جس نے 100 سال پہلے فٹ بال کے عالمی خطاب کے پہلے میچ کی میزبانی کی تھی۔

یوراگوئے کے وزیر کھیل سیباسٹین باؤزا نے کہا کہ ہمارے لیے اسے 2030 کا صد سالہ ورلڈ کپ کہا جانا چاہیے، اور ہماری توجہ بھی اسی جانب مبذول ہے۔

واضح رہے کہ فٹ بال کے 1930 میں ہونے والے پہلے ایونٹ میں صرف 13 ٹیمیں تھیں اور پورا ٹورنامنٹ ایک ہی شہر مونٹیویڈیو کے صرف تین اسٹیڈیموں میں کھیلا گیا تھا۔

سیباسٹین نے کہا کہ 2030 میں 48 ٹیمیں ہوں گی جس کے لیے چار ممالک کے تقریباً 15 اسٹیڈیم استعمال ہوں گے۔

سیباسٹین نے مزید کہا کہ اگر ہمارا منصوبہ کامیابی سے ہمکنار ہو جاتا ہے تو یہ پہلی بار ہوگا کہ زیادہ سے زیادہ چار ممالک ورلڈ کپ کی میزبانی کریں گے۔ جنوبی امریکہ میں منعقد ہونے والا آخری ورلڈ کپ برازیل 2014 تھا۔

واضح رہے کہ 2026  کا فیفا ورلڈ کپ پہلے ہی تین ممالک کینیڈا، میکسیکو اور امریکہ کو دیا جا چکا ہے۔

لاطینی امریکی خطہ کورونا وائرس وبائی مرض سے سب سے زیادہ متاثر ہونے کے باوجود چلی کے وزیر کھیل الیگزینڈرا بینڈو نے پیر کو شائع ہونے والے ایک انٹرویو میں اصرار کیا کہ چاروں ممالک ٹورنامنٹ کی میزبانی کرنے کی پوزیشن میں ہیں۔