سابق کپتان یونس خان کہتے ہیں کہ بابر اعظم اور ٹیم انتظامیہ کو فواد عالم اور اظہر علی کے پیچھے کھڑا ہونا چاہیے اور ان کی حمایت کرنی چاہیے۔

پاکستان کرکٹ ٹیم کے لیجنڈری بیٹر اور ٹی ٹوئنٹی ورلڈ کپ جیتنے والے کپتان یونس خان کا کہنا ہے کہ بابر اعظم اور ٹیم اتظامیہ کو اظہر علی اور فواد عالم کی فارم میں خرابی کے باوجود ان کی حمایت کرنی چاہیے۔

میڈیا سے بات کرتے ہوئے سابق کپتان نے کہا کہ ان کھلاڑیوں کی حمایت کرنی چاہیے جن کا ٹریک ریکارڈ اچھا رہا ہو اور وہ اپنی پرفارمنس بہتر کرنے کی کوشش کررہے ہوں۔

یونس خان نے کہا کہ ہمیں فواد عالم اور اظہر علی کی پشت پناہی کرنے کی ضرورت ہے، فواد عالم نے شاندار کم بیک کیا لیکن وہ اب آؤٹ آف فارم ہیں۔ ٹیم انتظامیہ کو اس وقت ان کا ساتھ دینے کی ضرورت ہے۔

واضح رہے کہ دونوں بلے بازوں کو سری لنکا کے خلاف کافی مشکلات کا سامنا کرنا پڑا، اظہر علی پہلے میچ میں صرف 9 رنز ہی بناسکے جبکہ فواد عالم نے دوسرے میچ میں صرف 25 رنز ہی اسکور کیے تھے۔

یاد رہے کہ یونس خان ریڈ بال کرکٹ میں پاکستان کے سب سے زیادہ رنز بنانے والے کھلاڑی ہیں اور ان کے دعوؤں کو سنجیدگی سے لینے کی ضرورت ہے کیوکہ اس کے لیے ان کے پاس کافی تجربہ ہے۔

سابق کپتان نے عبداللہ شفیق کے بارے میں بھی بات کی اور کہا کہ انہوں نے اپنے ٹیسٹ کرکٹ کا آغاز عمدہ فارم میں کیا تھا جبکہ انہوں نے امید ظاہر کی ہے کہ اوپننگ بلے باز پاکستان کے لیے اہم رنز بناتے رہیں گے۔