معروف ٹی وی میزبان فہد مصطفیٰ نے قومی بولر شاہ نواز دھانی کو سندھ کی شان قرار دے دیا ہے۔

پاکستان اور بھارت کے درمیان گذشتہ روز ٹی ٹوئنٹی ایشیا کپ کا گروپ میچ کھیلا گیا جس میں پاکستان کو شکست کا سامنا کرنا پڑا لیکن شاہ نواز دھانی کی دھواں دھاراننگز نے سوشل میڈیا پر دھوم مچادی ہے۔

اس میچ میں شاہ نواز دھانی کی بیٹنگ نے قومی ٹیم کو کچھ سہارا دیا اور آخری وکٹ پر کھیلتے ہوئے انہوں نے 6 گیندوں پر 16 رنز کی جارحانہ اننگز کھیلی۔

شاہ نواز دھانی کی اس اننگز کو شوبز شخصیات سمیت شائقین کرکٹ کی جانب سے خوب سراہا جارہا ہے جب کہ میزبان و اداکار فہد مصطفیٰ نے انہیں ’سندھ کی شان‘ قرار دیا ہے۔

Wah ray wah @ShahnawazDahani sindh jee shaan ♥️ pic.twitter.com/QF0LM6NCAS

Advertisement

— Fahad Mustafa (@fahadmustafa26) August 28, 2022

فہد مصطفیٰ نے مائیکرو بلاگنگ سائٹ پر ٹوئٹ کرتے ہوئے کہا کہ ’واہ رے واہ شاہ نواز دھانی، سندھ جی شان‘۔

پاک بھارت میچ

دبئی میں کھیلے گئے اس میچ میں بھارت نے ٹاس جیت کر پہلے بولنگ کرنے کا فیصلہ کیا تھا جب کہ پہلے بیٹنگ کرتے ہوئے پاکستان ٹیم 19.5 اوورز میں 147 رنز پر آل آؤٹ ہوگئی تھی۔

پاکستان کی جانب سے  محمد رضوان 43 رنز بنا کر نمایاں رہے، افتخار احم 28، شاہ نواز دھانی 16 اور کپتان بابر اعظم سمیت نائب کپتان شاداب خان 10،10 رنز بناکر پویلین لوٹ گئے۔

بھارت کی جانب سے بھونیشور کمار نے شاندار بولنگ کا مظاہرہ کرتے ہوئے 4 کھلاڑیوں کو آؤٹ کیا تھا اور ہاردک پانڈیا نے 3 وکٹیں حاصل کیں تھیں۔

ہدف کے تعاقب میں بھارتی ٹیم نے شاندار کھیل کا مظاہرہ کیا اور آخری اوور میں 2 گیندے قبل ہدف مکمل کرلیا تھا۔

بھارت کی جانب سے ویرات کوہلی اور رویندرا جڈیجہ نے 35،35 رنزبنائے، سوریا کماری یادو 18 جب کہ ہاردک پانڈیا 33 رنز بنا کر ناقابل شکست رہے تھے۔

پاکستان کی جانب سے محمد نواز نے 3 جبکہ نسیم شاہ نے 2 کھلاڑیوں کو آؤٹ کیا۔

واضح رہے کہ مین آف دی میچ کا اعزاز ہاردک پانڈیا کے نام رہا تھا۔ جنہوں نے میچ میں 25 رنز دے کر پہلے 3 کھلاڑیوں کو آؤٹ کیا تھا جب کہ بیٹنگ میں بھی انہوں نے 17 گیندوں پر 33 رنز بنائے تھے۔